Tenki fó asisténsia infraestruktura ba Povu

Ses. 27 agostu 2010, 10:04h
Passabe_PORTAL

Primeiru-Ministru, Kay Rala Xanana Gusmão, loron 16, fulan Agostu kontinua hala’o Programa Konsulta Planu Estratéjiku Dezenvolvimentu Nasionál iha sub-distritu Pásabe, distritu Oe-Kuse.

Sub-distritu Pásabe hanesan sub-distritu ida iha distritu Oe-Kuse hetan mós parte hodi sosializa PEDN tanba ne’e Xefe suku no povu Pásabe entusiazmu hodi simu sira nia liurai no ukun nain ho tradisaun adat hosi sub-distritu ne’ebé refere.

Iha fatin ne’e Administradór sub-distritu informa ba Primeiru-Ministru hanesan mós ulun bo’ot Governu nian katak jeográfikamente sub-distritu Pásabe, parte leste no weste no parte sul baliza ho Indonézia, parte norte baliza ho sub-distritu Oesilo no Nítibe. sub-distritu Pásabe kompostu hosi suku Abani no suku Malelat. Bazeia ba rezultadu provizóriu sensus uma-kain 2010, totál populasaun mane 3898, feto 4275, totál 8173 no totál uma-kain 1901.

Aproveita PEDN ne’ebe hato’o diretamente hosi Primeiru-Ministru, Kay Rala Xanana Gusmão, povu liu hosi reprezentante suku sira iha sub-distritu Pásabe informa katak Programa Pakote Dezenvolvimentu Desentralizasaun (PDD) no Planu Dezenvolvimentu Suku (PDS) bazeia ba Planu Estratéjiku Dezenvolvimentu Nasionál, ba tinan oin ba setór infraestrutura, atu bele fó asisténsia ba komunidade liuliu, hodi hadi’a estrada, eletrisidade, ponte, edukasaun, liña telekomunikasaun no uma sosiál, hahú hosi nivel aldeia to suku.

Responde ba kestaun hirak ne’e, Primeiru-Ministru mós informa katak, Planu Estratéjiku Dezenvolvimentu Nasionál (PEDN) nia objetivu mak oinsá atu bele liberta povu hosi mukiit ne’ebé tinan barak sei kesi metin hela povu nia kokorok desde ukun rasik aan. Uluk rai boot sira lafiar katak Timor-Leste sei ukun-aan, maibé tanba de’it povu ain-tanan ida-ne’e matenek hodi halo funu ikus mai ema hosi rai bo’ot mós simu katak Timór bele duni, tanba ne’e  ho Planu ida-ne’e povu mehi dala ida tan hodi husik aan hosi ki’ak no mukiit.

   Ba leten