Ministériu Edukasaun sei avansa ho faze daruak husi testes ba Bolsa Kandidatus Profesores hodi promove kualidade ensinu nasionál
Konsellu Ministrus, iha reuniaun loron 17 fulan-abríl tinan 2024, hato’o ninia apresiasaun pozitiva kona-ba realizasaun faze daruak husi testes ba Bolsa Kandidatus Profesores, hafoin aprezentasaun ba rezultadu faze dahuluk nian husi Ministra Edukasaun, Dulce de Jesus Soares. Medida ida-ne’e, implementa husi Ministériu Edukasaun, ho nia tema “Hamutuk Ita Harii Ita-Nia Nasaun, Liuhusi Edukasaun ida ne’ebé Kualidade”.
Faze dahuluk husi teste eskritu eletróniku ba Bolsa Kandidatus Profesores ne’e, hala’o husi loron 15 fulan-marsu to’o loron 16 fulan-abríl tinan 2024, ho objetivu hodi selesiona kandidatus atu prienxe totál vaga kandidatus 2400, iha ne’ebé kandidatu profesores bele rekruta ho fasil, tanba sira hatudu ona katak sira kumpre rekizitu ne’ebé lei husu/ezije.
Husi kandidatu 111273 ne’ebé hala’o ezame, rejista de’it 568 maka liu/pasa. Sei hala’o tan teste ba faze daruak hodi kompleta vaga ne’ebé sei falta, to’o 2400.
Iha serimónia abertura teste eskritu eletróniku ne’e, Ministra Edukasaun hateten tan katak, Governu kompromete atu promove kualidade hanorin iha Timor-Leste, ne’ebé sai hanesan prioridade ida iha Programa Governu Konstitusionál IX, no elementu importante ida ba dezenvolvimentu nasionál. Nia subliña tan katak hanorin ho kualidade ne’e depende ba profesores ne’ebé kualifikadu no dedikadu atu inspira no motiva alunu sira.
Iha okaziaun hanesan, Primeiru-Ministru, Kay Rala Xanana Gusmão, foka-liu ba importánsia sistema transparente ida iha kontratasaun funsionárius no afirma katak, Governu la’o tuir dalan loos no transparente hodi selesiona timoroan sira ne’ebé kapasitadu atu eduka labarik sira no halo sira sai sidadaun ne’ebé di’ak.
Prosesu teste eletróniku ida-ne’e reprezenta marku signifikativu ida ne’ebé hatudu esforsu hamutuk husi Governu, Ministériu Edukasaun, Komisaun Funsaun Públika no sosiedade sivíl. Ne’e hanesan prosesu ida ne’ebé loke oportunidade foun ba karreira profesores no hatudu kompromisu Governu nian ne’ebé atu kontinua hadi’a sistema edukasaun nasionál.
