Primeiru-Ministru husu atu labele hamosu tan krize hanesan tinan 2006

Kin. 26 agostu 2010, 17:11h
Liquica_PORTAL

“Desenvolvimentu iha ita nia nasaun atu la’o ho di’ak, husu atu labele hamosu tan krize hanesan tinan 2006 liubá iha ita nia Nasaun foun Timor Leste” hateten Primeiru-Minitru, Xanana Gusmão, bainhira hala’o konsulta Planu Estratéjiku Dezenvolvimentu Nasionál (PEDN) iha sub-distritu Likisá, distritu Likisá, iha loron 11, fulan Agostu.

Relasiona ho problema sira ne’ebé akontese iha 2006 katak osan barak ne’ebé ita hasai hosi 2007-2010 la’os atu hadi’a saída mak povu husu hanesan estrada, eletrisidade, uma, bee-mos, maibé osan ne’ebé ita gasta barak mak tau hodi rezolve problema sira ne’ebé ita rasik hamosu iha 2006 hanesan problema deslokadu sira no seluk tan tanba ne’e hanesan Xanana Gusmão.

Nuné mos Xefe IV Governu Konstitusionál ne’e hateten “atu hadi’a infra-estrutura bázika hanesan estrada, bee-mos, eletrisidade, uma no telekomunikasaun tenki muda sistema. Tanba ne’e governu agora iha ona sistema atu halo konstrusaun projetu infra-estrutura bázika iha sub-distritu ida nia laran, emprezáriu sira ne’e tenki mai duni hosi sub-distritu refere”.

Iha fatin hanesan Administradór sub-distritu Liquiça Vila iha nia diskursu hateten katak, sub-distritu Likisá hosi sul baliza ho tasi, norte baliza ho distritu Ermera, Leste baliza ho sub-distritu Bazartete no oeste baliza ho Sub-distritu Maubara. Iha sub-distritu Likisá kompostu hosi suku 7 aldeia 39. Maioria povu móris nu’udar agrikultór no produtu agrikultura nian mak hanesan, kafé, aifuan, modo tahan, alende ne’e iha parte tasi-ibun móris nu’udar peskadór.

Iha oportunidade ne’e mós Xefe suku nain 7 hosi sub-distritu Likisá Vila husu ba Primeiru-Ministru atu tau  atensaun ba estrada ligasaun hosi sub-distritu ba to’o iha suku no aldeia sira, edukasaun, saúde, eletrisidade no problema idozu sira nian ne’ebé durante ne’e ekipa ida hosi Ministériu Solidariedade Sosiál (MSS) hala’o ona verifikasaun dadus ba idozu sira nian, maibé to’o ohin loron seidauk hetan nafatin pensaun ferik-katuas sira nian.

Alende ne’e mós reprezentante veteranu sub-distritu Likisá Vila, Gregório dos Santos, husu ba Xefe Governu atu haree ba lejislasaun ne’ebé koalia kona-ba kritériu veteranu sira nian, tanba lei refere la valoriza frente klandestina sira no husu atu bele hadi’a lalais lei refere.

Konsulta PEDN iha sub-distritu Likisá hetan partisipasaun mós hosi Prezidente Repúblika, José Ramos-Horta, Vise-Primeiru-Ministru Asuntu Sosiál, José Luis Guterres, Ministra Justisa, Lúcia Lobato, Vise-Ministru Ekonomia no Dezenvolvimentu, Cristiano da Costa, Sekretáriu Estadu Formasaun Profisionál no Empregu, Bendito Freitas, Sekretáriu Estadu Kultura, Virgilio Smith, Sekretáriu Estadu Defeza, Julio Tomás Pinto, no membru Parlamentu Nasionál (PN) hosi Bankada Fretilin, Francisco Jerónimo.

   Ba leten