Governu haksolok tebes ho konfirmasaun ofisiál kona-ba Vizita Santu Padre nian mai Timor-Leste, iha loron 9 to’o loron 11 fulan-setembru tinan 2024
Governu Konstitusionál IX hato’o ninia laran kontente kona-ba konfirmasaun ofisiál husi Vizita Apostólika Sua Santidade, Papa Francisco nian ne’ebé hein kleur ona mai ita-nia país, husi loron 9 to’o loron 11 fulan-setembru tinan 2024. 
Anúnsiu ofisiál ne’e fó-sai husi Arsebispu Metropolitana Dili, Pró-Prezidente Konferénsia Episkopál Timorense no Koordenadór Jerál ekipa Igreja ba Vizita Santu Padre nian iha Timor-Leste, Sua Eminénsia Dom Virgílio do Carmo da Silva, hamutuk ho Reprezentante Sua Santidade nian iha Timor-Leste, Monseñór Marco Sprizzi, iha konferénsia imprensa ida ne’ebé hala’o ohin, loron 12 fulan-abríl tinan 2024, iha Kámara Ekleziástika Dili, iha Lesidere.
Iha anúnsiu ofisiál ne’e, Kardeál Dom Virgílio do Carmo no Monseñór Marco Sprizzi konsidera vizita ida ne’e “ eventu istóriku ida ba povu timoroan, ne’ebé hakarak tebetebes prezensa Santu Padre Francisco nian iha rai benzida ne’e. 
Sira mós hato’o sira-nia agradesimentu “ba Estadu Timorense, Sr. Prezidente Repúblika no Sr. Primeiru-Ministru, nune’e mós ekipa preparasaun vizita husi parte Governu nian, kolaborasaun di’ak tebes no esforsu iha preparasaun organizativa no Lojístika vizita ne’e, atu nune’e fiar-na’in timoroan hotu iha oportunidade hodi partisipa no hamutuk ho Santu Padre”.
Tuir anúnsiu ne’ebé hala’o husi Estadu Sidade Vatikanu nian, liuhusi ninia estrutura reprezentativa, hamutuk ho Igreja Katólika iha Timor-Leste, delegasaun ida uluk vizita país ne’e husi loron 26 to’o loron 29 fulan-janeiru tinan ida ne’e nian, vizita traballu ida hodi verifika kondisaun lojístika ba visita Sua Santidade nian, iha tempu ne’eba, sira hili Tasitolu hanesan fatin selebrasaun eukarístika prinsipál vizita ne’e nian. Fatin sira seluk iha Dili ne’ebé Sua Santidade sei vizita mós eskolla hamutuk husi Estadu, delegasaun ofisiál Papa nian, Nunsiatura Apostólika iha Timor-Leste no reprezentante Igreja Katólika iha Timor-Leste. Iha tempu badak, delegasaun vatikanu nian ida sei to’o hodi verifika inísiu preparativu vizita Papa nian ne’e. 
Reprezentante Governu, Vise-Koordenadór Jerál Altu Nivel Institusionál ba vizita papál no Koordenadór-Jerál ein ezersísiu, Ministru Tomás do Rosário Cabral hateten katak “ho esperansa tomak no entuziazmu boot, ita hein xegada Papa Francisco nian” no dezeja “ katak Vizita Apostólika ida ne’e, sai momentu bensan no renovasaun espirituál ba timoroan hotu, ne’ebé inspira ita ida-idak atu kontinua harii sosiedade ida bazeia ba valór pás, solidariedade, no fraternidade”. 
