Governu Timor-Leste

Aban, loron 12 fulan-abríl tinan 2024, tuku 7 kalan, iha Kamara Ekleziástika Arkidioseze Dili nian, iha Lesidere, sei fó-sai ofisiálmente data vizita Santu Padre nian mai Timor-Leste.

Reprezentante Santa Sé nian iha Timor-Leste, Monseñór Marco Sprizzi, konvida jornalista sira hotu atu partisipa iha konferénsia imprensa ne’e.

Lakleur tan, Governu Konstitusionál IX, liuhusi Komisaun Koordenadora ba Preparativus vizita Sua Santidade, Papa Francisco nian, mai Timor-Leste, sei mós organiza konferénsia imprensa ida atu fó-hatene kona-ba preparativus ne’ebé la’o hela ba vizita ida ne’ebé maka hein kleur ona ne’e.

Iha loron 12 fulan-fevereiru liubá, Monseñór Marco Sprizzi, “lori Santa Sé nia naran” agradese “ba serbisu boot-tebes, exelente, kompetente no efisiente ne’ebé halo hela iha preparasaun ba eventuál vizita Papa nian mai Timor-Leste”.

Monseñór Marco Sprizzi hateten tan katak, “delegasaun Vatikanu [ne’ebé iha fulan-janeiru mai Timor-Leste] sente admiradu tebes ho serbisu ne’ebé Governu Timor-Leste halo hela iha preparasaun ida-ne’e”.