Governu Timor-Leste

Governu, liuhusi Ministériu Agrikultura, Pekuária, Peskas no Florestas, komprometidu atu reforsa setór agríkola nasionál, iha loron 4 no 5 fulan-abríl tinan 2024, hala’o inisiativa lubun ida hodi promove dezenvolvimentu rurál nasionál. 

Iha loron 4 fulan-abríl, Ministériu Agrikultura, Pekuária, Peskas no Florestas, Marcos da Cruz, akompaña husi Prezidente Autoridade Munisipál Baukau, Veneranda Lemos, no Vise-Reprezentante Rezidente Programa Nasoins Unidas nian ba Dezenvolvimentu ( PNUD) iha Timor-Leste, Adeline Carrier, halo inaugurasaun ba sistema irrigasaun iha suku Fatulia, iha Munisípiu Baukau. Projetu ida-ne’e, implementa ho téknika rezisténsia klimátika no intervensaun agroflorestál nian, ho objetivu atu hasa’e kapasidade produtiva lokál. 

Sistema irrigasaun foun ne’e sei benefisia direta família na’in-157 ne’ebé hela iha suku Fatulia, hodi fó ba sira melloria signifikativa ida iha sira-nia kapasidade produsaun agrikultura no sira-nia reziliénsia hasoru dezafiu mudansa klimátika. 

Projetu ida-ne’e, finansia husi Governu iha parseira ho Fundu Verde ba Klima (GCF- sigla iha lian inglés) no PNUD, inklui konstrusaun no reabilitasaun ba infraestrutura rurál sira ho eskala ki’ik hamutuk 66, ne’ebé fahe ba munisípiu neen- Aileu, Baukau, Ermera, Likisá, Lautein e Vikeke. Projetu ne’e inklui mós jestaun sustentavel ba basias idrográfikas. 

Iha loron tuirmai, loron 5 fulan-abríl tinan 2024, Ministru Marcos da Cruz prezide hodi entrega tratór agríkola haat iha Munisípiu Vikeke, iha asaun ida ne’ebé hakarak atu reforsa kapasidade agríkola rejiaun ne’e nian, no nia objetivu atu aumenta efisiénsia no produtividade ba setór agríkola lokál. 

Durante períodu ida-ne’e, governante ne’e vizita mós obra sira ne’ebé la’o hela ba sistema irrigasaun Galata, iha Venilale, no Sobabere, iha Buibau. Sistema irrigasaun rua ne’e hotu iha Munisípiu Baukau.