Governu Timor-Leste

Durante ninia vizita, Sekretáriu-Jerál hala’o vizita kortezia ba Prezidente Repúblika, José Ramos-Horta, Prezidente Parlamentu Nasionál, Maria Fernanda Lay, Primeiru-Ministru Kay Rala Xanana Gusmão, no Prezidente Kámara Komérsiu no Indústria Timor-Leste (CCI-TL, Sigla iha lian portugés) Jorge Serrano. 

Iha loron 2 fulan-abríl tinan 2024, Vise-Primeiru-Ministru, Francisco Kalbuady Lay, loke sesaun diskusaun entre membrus Governu no Sekretáriu-Jerál ASEAN, Kao Kim Hourn, ho tema “Luta Timor-Leste nian ba Adezaun Plena ASEAN no papél Sekretariadu ASEAN”. Vise-Primeiru-Ministru, Mariano Assanami Sabino no membrus Governu Konstitusionál IX, partisipa iha sesaun diskusaun, ne’ebé modera husi Vise-Ministra ba Asuntus ASEAN, Milena Rangel. 

Iha loron hanesan, Sekretáriu-Jerál ASEAN hasoru malu ho Primeiru-Ministru, Kay Rala Xanana Gusmão, iha enkontru ida ne’ebé diskute kona-ba preparasaun Timor-Leste nian ne’ebé la’o hela kona-ba adezaun plena ba ASEAN. Primeiru-Ministru agradese ba prezensa Kao Kim Hourn no apoiu husi Sekretariadu ASEAN iha jornada ida-ne’e. Kao Kim Hourn reafirma vontade atu kontinua fó apoiu tomak ne’ebé presiza iha prosesu ida-ne’e, nia espresa ninia laran haksolok ba progresu sira ne’ebé Timor-Leste alkansa ona iha ninia preparasaun no apela mós ba nasaun hotu-hotu ASEAN nian atu kontinua fó apoiu ba Timor-Leste nia preparasaun atu bele alkansa adezaun ne’e iha tempu badak. 

Iha loron 3 fulan-abríl tinan 2024, Sekretáriu-Jerál ASEAN partisipa iha lansamentu ba Programa “Futuru Lider ba ASEAN”, programa lideransa ida ho durasaun fulan-14 ba lider foin-sa’e sira no futuru Timor-Leste nian, ne’ebé promove husi Ministériu Negósius Estranjeirus no Kooperasaun, liuhusi Gabinete Vise-Ministra ba Asuntus ASEAN. 

Programa “Futuru Lider ba ASEAN” ho objetivu atu dezenvolve kapasidade lider joven timoroan sira ho idade husi tinan 23 to’o 37, tuir sira-nia komprensaun kona-ba ASEAN no sira-nia kontribuisaun ba ajenda dezenvolvimentu Timor-Leste nian iha kontextu integrasaun rejionál. Grupu dahuluk ne’e konta ho partisipasaun joven 100 husi setor oioin sosiedade timorense nian.