Governu aprova ona rejime espesiál bolsas estudu ba setór justisa
Konsellu Ministrus, iha sorumutuk husi loron 27 fulan-marsu tinan 2024, aprova ona projetu Dekretu-Lei kona-ba rejime espesiál bolsas estudu ba setór justisa, ne’ebé aprezenta husi Primeiru-Ministru, Kay Rala Xanana Gusmão. 
Bolsas ne’e ho objetivu atu finansia kursu ensinu superiór hodi hetan grau lisensiatura, mestradu no doutoramentu iha siénsias jurídikas husi sistema sivilista, formasaun iha medisina legál, asaun formasaun profisionál, formasaun espesializada ba formadus sira Sentru Formasaun Jurídika no Judisiária, no estájiu profisionál hodi hala’o profisaun ida.
Programa ne’e sei finansia husi Fundu Dezenvolvimentu Kapitál Umanu no jere husi Grupu Traballu ba Reforma Setór Justisa, liuhusi orientasaun Primeiru-Ministru nian.
Programa bolsas estudu ne’e ho objetivu atu motiva estudante ensinu sekundáriu sira hodi aprende, hadi’a kapasidade aprendizajen no haluan benefisiáriu sira-nia hanoin, garante domina lian ofisial sira iha setor justisa, prienxe rekursu umanu kualifikadu sira ne’ebé falta iha setor justisa no hasa’e nivel kualifikasaun profisionál sira setor justisa nian.
Sidadaun sira ne’ebé prienxe rekizitu sira tuirmai ne’e bele kandidata an ba bolsas estudu tuir diploma ida-ne’e: sidadaun nasionál, tinan 17 ba leten no labele liu tinan 40, no mós domina lian portugés no inglés. Aleinde rekizitu sira ne’ebé temi ona, kandidatu sira prienxe ida husi rekizitu sira tuirmai ne’e, depende ba kondisaun: iha aproveitamentu di’ak durante tempu eskola iha ensinu sekundáriu ne’ebé sufisiente atu hetan grau lisensiatura ne’ebé sira kandidata an ba; tuir hela aulas lisensiatura iha siénsia jurídika iha ensinu superiór sira iha rai-li’ur, hetan lisensiatura iha siénsia jurídika no admitidu ona ba mestradu, formasaun profisionál ka estájiu profisionál iha instituisaun ensinu superior sira iha rai-li’ur; hetan grau mestre iha siénsia jurídika ka admitidu ona ba doutoramentu iha instituisaun ensinu superior sira iha rai-li’ur; ka iha lisensiatura iha medisina, ba kandidaturas ne’ebé hakarak foti espesialidade iha medisina legál.
