Hafoin Tinan hitu, Timor-Leste integra fali ba Komité Koordenasaun Programas Jeosiénsias Leste no Sudeste Aziátiku
Husi loron 4 to’o loron 7 fulan-marsu tinan 2024, Institutu Jeosiénsias Timor-Leste (IJTL) no Autoridade Nasionál Minerais (ANM) partisipa iha sorumutuk komité diresaun Programas Jeosiénsias Leste no Sudeste Aziátiku (CCOP, sigla iha lian inglés) nian ba da-82, ne’ebé hala’o iha Provínsia Siem Reap, iha Kamboja. 
CCOP ne’e hanesan organizasaun rejionál ida ne’ebé iha misaun ba promosaun kooperasaun iha área jeosiénsias entre país sira iha rejiaun ne’e. Durante sorumutuk ida-ne’e, reprezentante sira husi país membru halibur malu atu diskute kestaun importante sira ba setór ne’e, estabelese planu asaun no halo desizaun estratéjika sira ba futuru inisiativa jeosiénsias nian iha rejiaun ne’e. 
Eventu ne’e, organiza husi Ministériu Minas no Enerjia Kamboja, konta ho prezensa delegadu sira husi país membru oioin, ne’ebé inklui Brunei Darussalam, Kamboja, Xina, Indonézia, Japaun, Laos, Malázia, Mongólia, Myanmar, Papua Nova Giné, Filipinas, Tailándia, Timor-Leste no Vietname, no mós grupu konsultivu CCOP nian, Diretór no funsionáriu sira husi Sekretariadu Tékniku CCOP nian.
Destake prinsipál hosi sorumutuk ida-ne’e maka Timor-Leste filafali ba CCOP hafoin tinan 7 pauza. Konkista ida-ne’e rezulta husi esforsu kolaborativu sira ne’ebé lidera husi Ministru Petróleu no Rekursus Minerais, Francisco da Costa Monteiro, no Diretór CCOP, Young Joo Lee. Hanesan rezultadu, Ministru Petróleu no Rekursus Minerais nomeia formalmente Job Brites dos Santos, Prezidente Institutu Jeosiénsias Timor-Leste (IJTL) nian, hanesan Reprezentante Permanente, no Rafael Danilson Magno de Araujo, Prezidente Autoridade Nasionál Minerais (ANM), nu’udár Reprezentante Permanente Adjuntu iha CCOP. 
Auzénsia Timor-Leste nian ida-ne’e durante tinan hitu ikus ne’e rezulta lakon oportunidade, liuliu kona-ba partilla koñesimentu avansadu sira iha jeosiénsias no área importante sira seluk. Regresu ida-ne’e importante tebetebes hodi promove partilla koñesimentu no ba kolaborasaun entre país membru sira, liuliu iha área jeosiénsias, aleinde fó oportunidade atribuisaun bolsas estudu ba timoroan sira hodi hasai mestradu no doutoramentu iha jeosiénsias iha país dezenvolvidu sira, hanesan Japaun, Koreia Súl no Xina.
País membru sira CCOP nian simu ho di’ak tebes Timor-Leste ninia reintegrasaun no espresa esperansa katak partisipasaun país iha organizasaun ida-ne’e sei lori benefísiu signifikativu ba Timor-Leste no rejiaun tomak.
