Governu Timor-Leste

Konsellu Ministrus, iha sorumutuk loron 20 fulan-marsu tinan 2024, aprova ona projetu Dekretu Governu, ne’ebé aprezenta husi Ministru Tomás do Rosário Cabral, ne’ebé estebelese data ba realizasaun Asembleia Aldeia no Konsellu Suku iha ámbitu prosedimentu eleisaun lider komunitáriu sira. 

Tuir kalendáriu ne’ebé aprova ona, Eleisaun Xefe Suku ne’e sei hala’o iha loron 27 fulan-abríl no apuramentu ba rezultadu tenke termina iha loron 28 fulan-abríl tinan 2024. Uainhira laiha kandidatu xefe suku ne’ebé maka hetan votu válidu liu metade ne’ebé fó-sai, sei realiza filafali votasaun daruak entre kandidatu rua ne’ebé hetan votu maioria iha loron 13 fulan-maiu tinan 2024. 

Iha loron 28 fulan-Outubru 2023, halo ona eleisaun sira ne'ebé koresponde ba maioria husi Sukus hotu, maibé eleisaun iha Suku sanulu ne'ebé mandatu sira iha tiha ona to'o tinan ida-ne'e, nune'e dadaun ne'e presiza atu ajenda realizasaun ba eleisaun iha Sukus maka hanesan Lequitura (Aileu), Bocolelo (Aileu), Ailoc (Dili), Bebonuc (Dili), Madohi (Dili), Manleu-Ana (Dili), Mantelolão (Dili), Sicone-Dilole (Manatuto), Laicore (Manatuto) no Builo (Viqueque), no mós inklui eleisaun ba Xefe Aldeia Rebutic Eon, iha munisípiu Manatuto.

Prosesu konstituisaun meza eleitorál suku no kandidaturas ba eleisaun Xefe Suku no ninia kontensiozu, sei hala’o iha loron 12 fulan-abríl tinan 2024. Períodu informasaun públika no edukasaun eleitór kona-ba prosesu eleisaun lideransa komunitária nian sei hala’o to’o loron 24 fulan-abríl tinan 2024. 

Votasaun ba eleisaun Lia na’in no Reprezentantes Juventude ba Konsellu Suku sei hala’o to’o loron 8 fulan-maiu ka to’o loron 24 fulan-maiu tinan 2024.

Haree kalendáriu kompletu iha link tuirmai: http://timor-leste.gov.tl/?p=36818&lang=tp