Governu Timor-Leste

Diretór Ezekutivu Ajénsia TIC TIMOR IP, Venâncio Pinto, lidera delegasaun nasionál ne’ebé marka prezensa iha “Forum Governu Dijitál no Espozisaun Teknolojia Dijitál”, ne’ebé realiza iha Phnom Penh, Kamboja, hosi loron 11 to’o 13 fulan-marsu tinan 2024. 

Forum Governu Dijitál 2024, ho tema “Dezenvolvimentu Sustentável no Inkluzivu liuhusi Implementasaun Polítika Dijitál” inklui “Espozisaun Internasionál Governu Dijitál no Teknolojia Dijitál Kamboja” dahuluk ho objetivu atu haree-liu konkista iha transformasaun governu dijitál. 

Eventu ida-ne’e halibur reprezentante husi Estadus Membrus ASEAN nian no rejiaun Pasífiku, nomós parseirus dezenvolvimentu, setór privadu no espesialista sira  setor ida-ne’e nian atu diskute no fahe experiénsia sira ne’ebé relasiona ho formulasaun no implementasaun polítika, tendénsia foun iha teknolojia dijitál no lisaun sira ne’ebé aprende ona nune’e mós pratika di’ak-liu iha aselerasaun ba transformasaun dijitál, nomós uzu ba teknolojia foun sira.

Durante Forum ida-ne’e, delegasaun nasionál simu husi Primeiru-Ministru Reinu Kamboja nian, Samdech Hun Manet, no hasoru malu ho autoridade lokál sira atu diskute memorandu entendimentu iha área teknolojia no dijitalizasaun.