Sekretária Estadu Igualdade destaka avansus Timor-Leste nian iha Sesaun ba da-68 Komisaun kona-ba Estatutu Feto
Sekretária Estadu Igualdade, Elvina Sousa Carvalho, iha loron 14 fulan-marsu tinan 2024, halo intervensaun ida iha ne’ebé ko’alia-liu avansus ne’ebé Timor-Leste alkansa ona iha área direitu feto sira nian durante sorumutuk altu nivel Sesaun ba da-68 Komisaun kona-ba Estatutu Feto (CSW, sigla iha lian inglés), ne’ebé realiza iha Sala Asembleia Jerál Nasoins Unidas, Novaiorke. 
CSW ne’e, sorumutuk anuál boot-liu ONU nian kona-ba igualdade jéneru no empoderamentu feto sira nian, hahú iha loron 11 fulan-marsu no sei kontinua to’o loron 22 fulan-marsu. Tema ba tinan ida-ne’e mak “aselera konkretizasaun igualdade jéneru no empoderamentu ba feto no labarik-feto sira hotu, hodi kombate moris-ki’ak no hametin instituisaun sira no finansiamentu ho perspetiva jéneru”.
Durante ninia intervensaun, Sekretária Estadu ne’e ko’alia-liu susesu sira ne’ebé Timor-Leste alkansa ona iha realizasaun kompromisu nasionál liuhusi promove igualdade jéneru no empoderamentu feto sira nian. Nia destaka liuliu kona-ba lideransa Timor-Leste nian iha rejiaun Ázia no mundu, tantu feto sira-nia partisipasaun polítika nune’e mós iha okupasaun kargu lideransa nian. Nia salienta tan implementasaun polítika sira ne’ebé ho objetivu atu promove igualdade jéneru iha setór hotu-hotu iha sosiedade. 
Timor-Leste sai ona ezemplu inspiradór ida iha promosaun direitus no lideransa feto sira nian, la’ós de’it iha rejiaun Ázia, maibé mós iha mundu. Feto sira okupa asentu liu katoluk ida iha Parlamentu Nasionál, no daudaun ne’e, país iha feto dahuluk ne’ebé asume kargu nu’udar Prezidente Parlamentu Nasionál. Iha mós feto sira ne’ebé okupa kargu ministeriál, prezidénsia autoridade munisipál, xefia iha suku no aldeia sira, no ko’alia-liu kompromisu país nian kona-ba igualdade jéneru no empoderamentu feto sira iha nivel hotu-hotu. 
Sekretária Estadu ne’e mós destaka implementasaun polítika no inisiativa importante sira iha área ida-ne’e, hanesan Planu Asaun Nasionál kona-ba Violénsia Bazeia ba Jéneru (2022-2032) no Deklarasaun Maubisi, ne’ebé ho objetivu atu empodera feto rurál sira liuhusi asesu ba mikro-kréditu, indústria lokál sira, turizmu, agrikultura no peska. 
Durante Sesaun ba da-68 Komisaun kona-ba Estatutu Feto nian, Elvina Sousa Carvalho, realiza sorumutuk bilaterál balun ho reprezentante sira husi Singapura, Xile no Feto ONU, hodi diskute esperiénsia no oportunidade kolaborasaun, nune’e mós reafirma kompromisu kontínuu Timor-Leste nian liuhosi promosaun igualdade jéneru no empoderamentu ba feto sira.
Komisaun dahuluk kona-ba Estatutu Feto nian hasoru-malu iha tinan 1947, tinan rua de’it hafoin fundasaun Nasoins Unidas, bainhira grupu ida ho feto 15 ne’ebé reprezenta governu iha mundu tomak halibur hamutuk iha Novaiorke hodi hahú harii baze jurídika internasionál ba igualdade jéneru.
