Ministériu Saúde reafirma ninia kompromisu ba igualdade jéneru no luta kontra violénsia bazeia ba jéneru iha Timor-Leste, iha okaziaun Loron Internasionál Feto, iha loron 8 fulan-marsu tinan 2024, ho moto “Sura ho Nia: Investe iha Feto. La Husik Ema Ida Iha Kotuk!  Aselera Progresu Setór Saúde hodi Responde   ba Violénsia bazeia ba jéneru iha Timor-Leste”. Serimónia ne’e realiza iha City 8, Dili, konta ho apoiu tékniku husi Fundu Nasoins Unidas ba Populasaun (UNFPA, sigla iha lian inglés) iha Timor-Leste, liuhusi Projetu ne’ebé Finansia husi KOIKA, “Hamutuk ba Igualdade” (T4E, Together for Equality). 

Iha ninia intervensaun, Ministra Saúde Timor-Leste, Élia A. A. dos Reis Amaral hato’o ninia parabéns ba feto hotu iha mundu, espesiál ba feto sira iha Timor–Leste, tanba rekoñese papél krusiál husi professional saúde sira   iha prestasaun servisus kualidade ba sobrevivente hosi violénsia bazeia ba jéneru. Ministra subliña importánsia kolaborasaun entre servisus oioin, hanesan polisia, podér judisiáriu, setor sosiál no organizasaun sira sosiedade sivíl nian, atu identifika no lori sobrevivente sira ba kuidadus médikus no tratamentus abranjentes. 

Elia Amaral ko’alia-liu mós kona-ba nesesidade atu envolve labarik-mane no mane sira iha promosaun ba igualdade no prevensaun ba violénsia.

Domingos Bernardo, responsavel UNFPA nian iha Timor-Leste, fó-énfaze katak Loron Internasionál Feto, fó oportunidade ida atu reflete kona-ba esforsu no progresu sira ne’ebé halo ona atu alkansa Objetivu Dezenvolvimentu Sustentavel 5 kona-ba Igualdade Jéneru. Ida-ne’e hanesan momentu oportunu ida atu selebra asaun korajen no determinasaun nian hosi feto sira ne’ebé fó ona kontribuisaun estraordinária ba istória no dezenvolvimentu ita-nia sosiedade no ita-nia rain doben. Violénsia bazeia ba jéneru nafatin sai hanesan violasaun diretus umanus no problema saúde públiku ida iha Timor-Leste. 

Ministériu Saúde, serbisu hamutuk ho Institutu Nasionál Saúde Publika Timor-Leste no apoiu husi UNFPA, kapasita profisionál saúde sira no harii fatin seguru iha munisipiu Vikeke, Likisá, Bobonaru (Atabae) e Ermera (Gleno) atu fó apoiu no serbisu esensiál sira ba sobreviventes husi violénsia bazeia ba jéneru, hodi garante privasidade no konfidensialidade. Sei lansa fatin foun sira ne’ebé seguru iha Lospalos, Baucau, Dili no Covalima.