Governu Timor-Leste

Ministru Negósius Estranjeirus no Kooperasaun anunsia lansamentu TL IMPACT, inisiativa estratéjika ida ne’ebé marka pasu signifikativu ida iha jornada Timor-Leste nian iha diresaun integrasaun ba Asosiasaun Nasoins Sudeste Aziátiku (ASEAN). 

Faze dahuluk hosi inisiativa ida-ne’e, ne’ebé hala’o hosi loron 12 to’o loron 14 fulan-marsu tinan 2024, ne’ebé harii liuhosi kolaborasaun ho Banku Dezenvolvimentu Aziátiku (ADB, Sigla iha dalen inglés) no bazeia ba serbisu preparatóriu ne’ebé halo ona iha Relatóriu Apoiu ba Kapasidade (CST- sigla iha dalen inglés) ne’ebé hala’o iha tinan 2021. TL IMPACT, ka Avaliasaun Integrada Prosesu no Transformasaun nian ba Dezenvolvimentu Timor-Leste (Timor-Leste Integrated Measurement of Progress and Transformation for Development), ho objetivu prinsipál mak atu sai nu’udár ferramenta abranjente ida hodi avalia prontidaun no progresu iha kumprimentu rekizitu sira ne’ebé estabelese ona iha Roteiru atu Timor-Leste nia adezaun plena ba bloku rejionál, ne’ebé anunsia husi lider sira ASEAN nian iha fulan-maiu tinan 2023.

Iha serimónia lansamentu ne’e, Vise-Ministra ba Asuntus ASEAN, Milena Rangel, fó-énfaze katak “adezaun ba ASEAN sai ona kompromisu ida ne’ebé kleur ona ba Timor-Leste, tanba rekoñese benefísiu barak ne’ebé integrasaun ekonómika rejionál bele fó. Adezaun ba ASEAN la’ós de’it integrasaun simples iha komunidade ida, maibé sai mós nu’udar oportunidade ida atu dudu ba oin ita-nia dezenvolvimentu no transformasaun rasik hanesan nasaun.”

Sei hala’o TL IMPACT iha kolaborasaun ne’ebé metin ho ministériu no instituisaun setoriál relevante tomak iha ámbitu Komunidade Ekonomia ASEAN nian (AEC- sigla iha dalen inglés) no ho objetivu atu sinkroniza esforsus entre interveniente sira hodi demonstra progresu konkretu sira ba integrasaun rejionál. Ne’e mós ho intensaun atu identifika área sira ne’ebé bele fornese apoiu espesífiku ba ministériu no instituisaun setoriál sira, tuir akordu ekonomia ASEAN nian no planu estratéjiku nasionál sira. 

Ezersísiu kontínuu ida-ne’e, TL IMPACT, programa ona atu halo atualizasaun ho regulár no sei sai hanesan ferramenta esensiál ida hodi monitoriza progresu Timor-Leste nian durante tinan sira tuirmai, liuliu konsidera katak tinan 2025 hanesan tinan referénsia nian ne’ebé estabelese husi lider sira hodi adere ba ASEAN.

Ministériu Negósoius Estranjeirus no Kooperasaun espresa ninia sinsera gratidaun ba ministériu no instituisaun setoriál sira ba apoiu ezemplár, hodi ko’alia-liu kona-ba Timor-Leste nia kompromisu no kapasidade hodi adopta abordajen governamentál no nasionál ida ne’ebé abranjente atu alkansa adezaun ba ASEAN.