Vaga sira iha Funsaun Públika
Komisaun Funsaun Públika fó hatene, iha fulan Novembru tinan 2009, vaga servisu nian ne’ebé iha ba departementu oioin husi kedan tinan 2008. Vaga hirak ne’e hetan aprovasaun maibé la iha mak prienxe. Maske nune’e, iha tiha ona anúnsiu kona-ba vaga hirak ne’ebé hetan aprovasaun iha tinan sivíl 2010. “ proposta sira mai husi Ministériu rua nulu, inkui Sekretaria Estadu sira”, esplika Prezidente Komisaun funsaun Públika, hodi hatutan tan katak “vaga hamutuk 450 ba funsionáriu permanente mak fó sai tiha ona. Vaga hamutuk 200 ona mak hetan prienximentu, ne’e katak, sei iha vaga 250 ne’ebé mak mamuk ba funsionáriu permanente sira. Iha mós vaga hamutuk 500 ba funsionáriu temporáriu sira. Prosesu ba vaga sira grau A – tékniku superiór – konklui hotu ona. Vaga ba tékniku profisionál iha hela faze hakerek nian. Hela de’it entrevista profisionál. Foin lalais ne’e hala’o ezame ba tékniku administrativu sira, iha jináziu, tanba iha kandidatu barak”.
Tuir Libóriu Pereira, kazu ida ikus ne’e hanesan situasaun ida ne’ebé mosu fila-fila ona, bainhira iha selesaun ba ema ne’ebé atu sai funsionáriu. “Ha’u fó ezemplu ida, ami presiza seguransa 114 maibé ema ne’ebé kandidata-an hamutuk rihun tolu. Ba kazu ida ne’e, ami aumenta tan etapa prosesu selesaun nian. Ami aumenta tan ezame fíziku ida. Husi ema rihun tolu ne’e, kandidatu na’in 140 mak liu ba entrevista”.
