Governu Timor-Leste

Primeiru-Ministru, Kay Rala Xanana Gusmão, iha loron 4 fulan-marsu tinan 2024, partisipa iha eventu ida ne’ebé organiza husi komunidade Myanmar ne’ebé hela iha Melbourne, Austrália. Durante eventu ne’e, reafirma ninia apoiu luta ba liberdade, promove pás no unidade nasionál, ho objetivu atu hakotu konflitu polítiku-militár ne’ebé afeta país ne’e dezde tinan 2021, uainhira junta militár asume podér. 

Xefe Governu Timor-Leste reafirma nesesidade atu implementa konsensu pontu lima ne’ebé asina ona husi lider sira ASEAN nian iha tinan 2021 hodi rezolve konflitu iha Myanmar. Akordu ida-ne’e ko’alia kona-ba pontu krusiál lima, inklui hapara imediata violasaun, promove diálogu konstrutivu entre parte hotu-hotu, fasilita mediasaun liuhusi ASEAN, fó asisténsia umanitária no hala’o sorumutuk iha Myanmar entre reprezentantes ASEAN nian no parte hotu-hotu ne’ebé envolve. 

“Ha’u apela ba junta militár atu respeita prinsípiu demokrátiku no vontade liberdade povu Myanmar nian. Ami-nia esperiénsia luta nian halo ha’u rekoñese valór diálogu no demokrasia, nune’e mós importánsia solidariedade internasionál nian. Ami tenke dehan ba povu Myanmar katak sira la mesak, ami hamutuk ho sira, hodi apoia sira to’o sira-nia mehi sai realidade”, deklara Xanana Gusmão. 

Primeiru-Ministru enkoraja komunidade Myanmar iha Austrália atu kontinua realiza kampaña boot, ho envolvimentu grupu solidariedade no lider polítiku sira husi mundu tomak, atu hamutuk hetan solusaun ida ba konflitu ne’e. 

Reprezentante Governu Unidade Nasionál Myanmar nian iha Austrália, Tun Aung Shwe, espresa ninia gratidaun ba Primeiru-Ministru Xanana Gusmão no povu Timor-Leste ba sira-nia apoiu tomak hodi rezolve krize militár iha Myanmar.