Primeiru-Ministru Timor-Leste, Kay Rala Xanana Gusmão, hala’o sorumutuk bilaterál ida ho Primeiru-Ministru Nova Zelándia, Christopher Luxon, iha loron 5 fulan-marsu tinan 2024, durante Simeira komemorativa ba da-50 aniversáriu parseria diálogu Austrália ho ASEAN , ne’ebé realiza iha Sentru Konvensoins no Espozisoins Melbourne. 

Durante sorumutuk ida-ne’e, lider rua-ne’e diskute fortalesimentu no expansaun kooperasaun entre Timor-Leste no Nova Zelándia, ba benefísiu populasaun país rua-ne’e nian.

Primeiru-Ministru Xanana Gusmão hato’o ninia gratidaun ba kompromisu kontínuu Nova Zelándia nian hodi apoia dezenvolvimentu Timor-Leste no agradese ba Primeiru-Ministru neozelandés ba apoiu adezaun Timor-Leste nian ba ASEAN, no ko’alia-liu importánsia hosi integrasaun rejionál ida-ne’e. 

Christopher Luxon reafirma kompromisu Nova Zelándia nian hodi hametin kooperasaun bilaterál, liuliu iha setór edukasaun no defeza. Primeiru-Ministru neozelandés ne’e espresa vontade hodi kontinua apoia Timor-Leste iha formasaun rekursus umanus, nune’e mós inisiativa sira ne’ebé iha relasaun ho seguransa no defeza.

Lider rua-ne’e ko’alia-liu importánsia kolaborasaun diplomátika durante tempu naruk entre Timor-Leste no Nova Zelándia, no rekoñese nesesidade hodi promove no diversifika lasu sira ne’e iha área oioin.

Aleinde Primeiru-Ministru rua-ne’e, delegasaun Timor-Leste inklui Vise-Primeiru-Ministru no Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Vise-Ministra ba Asuntus ASEAN, Milena Rangel, Ministru Negósius Estranjeirus no Kooperasaun, Bendito dos Santos Freitas, Embaixadora Timor-Leste iha Austrália, Inês de Almeida, Xefe Gabinete Primeiru-Ministru nian, Elizabeth Exposto, no ekipa téknika.