Governu Timor-Leste

Ministru Petróleu no Rekursus Minerais, Francisco da Costa Monteiro, partisipa iha Feira Petróleu Ejitu (EGYPES) 2024, ne’ebé realiza iha Sentru Internasionál Espozisaun Ejitu, husi loron 19 to’o 21 fulan-fevereiru. Ho tema “Dezenvolve Tranzisaun Enerjétika, Seguransa no Dezkarbonizasaun”, eventu ne’e hetan apoiu husi Ministériu Ejípsiu Petróleu no Rekursus Minerais, ne’ebé atrai partisipante liu 35.000 no delegadu 2.200, inklui kadeia fornesimentu hotu-hotu no valór enerjia nian.

EGYPES 2024 oferese ambiente ida ne’ebé apoia ba diskusaun abranjente sira kona-ba dinámika enerjétika mundiál, tendénsia indústria atuál, progresu rejionál no asaun koletiva hodi alkansa emisoins líkidas zero.

Durante ninia partisipasaun iha painél diskusaun kona-ba “Garante Enerjia ida ne’ebé Sustentavel no Asesivel ba Ema hotu”, Ministru Francisco Monteiro partilla perspetiva Timor-Leste nian kona-ba dezafiu no oportunidade iha garantia enerjia. Ko’alia-liu kona-ba importánsia desizaun ne’ebé ho kuidadu no adosaun teknolojia foun ba dezkarbonizasaun setór petróleu no gás nian. Ministru fó-énfaze katak Timor-Leste hakarak futuru ida ne’ebé enerjia solár no fonte renovavel sira seluk dezempeña papél signifikativu ida iha país ne’e, maske atuál predominánsia husi idrokarbonetu no gás naturál iha fonte enerjétika nasionál. 

Ministru Francisco Monteiro mós esplika esforsu país nian hodi elabora lejizlasaun ba atividade minerál, ho objetivu atu kategoriza minerál estratéjiku no krítiku hodi masimiza benefísiu iha kadeia valór. Esplika mós katak, ninia objetivu atu dezenvolve indústria husi extrasaun to’o refinasaun no industrializasaun, hodi nune’e bele asegura kreximentu ida ne’ebé sustentavel no prosperidade ekonómika.

Iha marjen EGYPES ne’e, Ministru Francisco da Costa Monteiro hala’o sorumutuk ho ninia omólogu ejípsiu, Tarek El-Molla, hodi diskute kona-ba posibilidade kooperasaun iha indústria petróleu no gás. Ministru rua-ne’e esplora área potensiál sira kolaborasaun nian, inklui troka esperiénsia no prátika di’ak-liu iha setór ne’e.

Rezultadu prinsipál ida husi sorumutuk ne’e, maka konvite ne’ebé fó ba empreza nasionál petróleu Timor-Leste, TIMOR GAP, EP, hodi esplora oportunidade kooperasaun no fahe koñesimentu ho omólogu ejípsiu sira. Ministru Francisco Monteiro hato’o ninia apresiasaun ba konvite ne’e, hodi subliña importánsia husi kolaborasaun ida-ne’e atu aumenta kapasidade no kompeténsia indústria petróleu no gás Timor-Leste nian.

Partisipasaun Timor-Leste iha EGYPES 2024 ne’e permite atu hametin lasu kooperasaun internasionál no reafirma kompromisu país nian ba tranzisaun enerjétika ida ne’ebé sustentavel no hetan parseria estratéjika ba dezenvolvimentu kontínuu indústria enerjétika nian.