Governu Timor-Leste

Ministru Administrasaun Estatál, Tomás do Rosário Cabral, nu’udar Vise-Koordenadór Jerál Altu Nivel Institusionál ba vizita Sua Santidade Papa Francisco nian, iha ninia gabinete simu Reprezentante Santa Sé iha Timor-Leste, Monseñór Marco Sprizzi, iha loron 26 fulan-fevereiru tinan 2024, hodi diskute kona-ba preparasaun vizita Santu Padre nian.

Sorumutuk ne’e ho objetivu atu hare filafali preparasaun kona-ba vizita Santu Padre mai Timor-Leste ne’ebé la’o hela, nune’e mós halo diskusaun kona-ba inisiativa sira tuirmai ne’ebé sei halo ho objetivu atu asegura susesu ba vizita ida-ne’e. 

Iha loron 12 fulan-fevereiru liubá, Monseñór Marco Sprizzi hateten katak, maske “seidauk bele konfirma data”, “Governu Timor halo hela preparasaun ida ne’ebé di’ak-tebes” no “lori Santa Sé nia naran” agradese “ba serbisu boot-tebes, exelente, kompetente no efisiente ne’ebé halo hela iha preparasaun ba eventuál vizita Papa nian mai Timor-Leste”.

Ba vizita ida-ne’e, Ministru Administrasaun Estatál, Tomás do Rosário Cabral, nomeia nu’udar Vise-Koordenadór Jerál Altu Nivel Institusionál nian husi Primeiru-Ministru, Kay Rala Xanana Gusmão, liuhusi Despaxu n. 012/GPM/I/2024, loron 11 fulan-janeiru tinan 2024, nune’e mós Ministru Prezidénsia Konsellu Ministrus, Agio Pereira, nu’udar Koordenadór Jerál Altu Nivel Institusionál.