Ministru Justisa, Sérgio de Jesus Fernandes da Costa Hornai, no Vise-Ministra Finansas, Felícia Claudinanda Cruz Carvalho, partisipa iha Konferénsia no Debate “Osan Povu Nian, Jere Ho Di’ak”, ne’ebé hala’o iha loron 22 no 23 fulan-fevereiru tinan 2024, iha Hotel Timor, Dili. Eventu ida-ne’e nu’udar enserramentu ba projetu “Parseria ba Melloria Prestasaun Servisu liuhusi Reforsa Jestaun no Supervizaun Finansas Públikas iha Timor-Leste” (PFMO – Public Finance Management Oversight). 

Durante tinan neen ikus ne’e, PFMO, ne’ebé gia ho lema “Osan Povu Nian Jere ho Di’ak”, dezempeña ona papél importante ida hodi hasa’e kompeténsia entidade nasionál sira nian iha ámbitu jestaun no supervizaun finansas públikas. Projetu ida-ne’e promove diálogu no interasaun entre entidade timorenses no portugezes. Ho investimentu totál euro millaun 12,6, PFMO ne’ebé finansia hamutuk husi Uniaun Europeia no finansia no jere hamutuk husi Camões, IP. 

Embaixadór Uniaun Europeia, durante serimónia foka-liu katak “Timor-Leste laiha dúvida, iha momentu ida ne’ebé importante tebes ba ninia dezenvolvimentu no iha kondisaun nesesária hodi mantein ninia kompromisu iha área esensiál sira, entre área sira ne’e ko’alia-liu kona-ba Justisa no Finansas Públikas.”

Durante tinan neen implementasaun projetu ne’e nian, realiza ona formasaun téknika liu oras rihun 169 no formasaun iha lian portugés oras rihun 63. Liuhusi PFMO, ema 146 tama ona iha Sistema Terras no Propriedade, investigadór no tékniku laboratóriu PSIK nian 101, juis 33 no prokuradór 18 mak simu ona formasaun.