PEDN Esperansa Libertasaun povu nian iha sub-distritu Kailaku
Primeiru-Ministru, Kay Rala Xanana Gusmão, kontinua hala’o konsulta ba Planu Estratéjiku Dezenvolvimentu Nasionál (PEDN) ba loron tolu iha sub-distritu Kailaku, distritu Bobonaro, segunda (26/07). Primeiru-Ministru, Kay Rala Xanana Gusmão, ho nia komitiva simu diretamente hosi Administradór sub-distritu Kailaku no populasaun tuir kultura tradisaun ho hatais Kailaku no akompaña ho kulturál (tebedai) bidu hodi simu Primeiru-Ministru ba to’o fatin konsulta PEDN.
Iha fatin hanesan, Primeiru-Ministru ne’ebé simu mós hosi lia-nain sira ho lisan gose katak ho mama malus no buah no mós lia hamulak hosi lian-nain sira ho dalen kemak.
Administradór sub-distritu Kailaku, Alfredo Moniz da Costa, hato’o esplikasaun kona-bá kondisaun jeográfika sub-distritu Kailaku ne’ebé kompustu hosi suku 8, aldeia 24, parte leste baliza ho sub-distritu Hatulia no Atsabe, sul baliza ho sub-distritu Bobonaro, norte baliza ho Atsabe no oeste baliza ho sub-distritu Maliana no maioria móris nu’udar agrikultór iha área produtiva natar no to’os.
Administradór sub-distritu ne’e salienta m’os katak sub-distritu Kailaku enfrenta difikuldade hanesan, presiza apoiu transporte multifunsi ba servisu saúde nian, harii postu saúde, edukasaun, transporte motorizada ba eskola, loke rekrtamentu ba PNTL, apoiu tratór, estudu klean kona-bá barajen, estrada, apoiu bronjong atu bele proteje natar sira, irigasaun no infraestrutura bázika sira hanesan estrada, eletrisidade, bee-mos no mós preokupasaun kona-bá dadu veteranu sira.
Iha intrudusaun ba konsulta ne’e Primeiru-Ministru, Kay Rala Xanana Gusmão, hato’o katak ho ksolok ita bele hamutuk iha ne’e hodi halo refleksaun badak kona-bá saída mak akontese iha kotuk hodi bele sukat saída mak ita bele no tenke halo ba ohin no aban bainrua nian.
Hatán ba preokupasaun ne’ebé kestiona iha oportunidade ne’e, Primeiru-Ministru entrega tempu ba iha membru Governu sira ne’ebé akompaña hodi fó resposta ba iha prekupasaun hosi Administradór sub-distritu no líder komunitáriu sira nian.
Akompaña Primeiru-Ministru iha konsulta PEDN mak hanesan, Ministru Turizmu, Komérsiu no Indústria, Gil Alves; Ministru Administrasaun Estatál no Ordenamentu Teritóriu, Arcângelo Leite; Sekretáriu Estadu Pekuária, Valentino Varela; Sekretáriu Estadu Juventude no Desportu, Miguel Manetelo; Sekretáriu Estadu Dezastre Naturál, Jacinto Rigoberto; Sekretáriu Estadu Agrikultura, Marcos da Cruz no Sekretáriu Estadu Obras Públikas, Domingos Caeiro.
