Ministério Planeamentu no Investimentu Estratéjiku diskute akordu kooperasaun téknika ho Infraestruturas Portugál
Iha loron 20 fulan-fevereiru liubá, Ministru Planeamentu no Investimentu Estratéjiku, Gastão Francisco de Sousa, lidera delegasaun nasionál ida iha sorumutuk ida iha sede Infraestruturas Portugál (IP), iha Lizboa.
Sorumutuk ne’e ho objetivu atu diskute akordu potensiál ida kona-ba kooperasaun téknika hodi hasa’e kapasidade entidade jestora infraestruturas iha Timor-Leste. 
IP hanesan empreza públika portugeza ida ne’ebé responsavel ba planeamentu, konstrusaun, jestaun no manutensaun ba rede ferroviária no rodoviária Portugál.
Iha sorumutuk ne’e, Ministru Gastão de Sousa, akompaña husi Koordenadór Unidade Investimentu Estratéjiku, Pedro Lay, Diretór Adjuntu Komisaun Nasionál Aprovizionamentu, Nelson Santos no Embaixadora Timor-Leste iha Portugál, Isabel Guterres.
Hafoin aprezentasaun ida kona-ba projetus ne’ebé IP hala’o hela, parte rua-ne’e aborda áreas ne’ebé bele hala’o serbisu kooperasaun téknika, no reafirma kompromisu mútua hodi esplora oportunidade kooperasaun nian. Sorumutuk ne’e taka ho vizita ida ba Sentru Kontrolu Tráfegu (CCT, sigla iha lian portugés), ne’ebé dirije husi Jestora Sentru Kontrolu Tráfegu (DRR), Celeste Assunção.
