Governu Timor-Leste

Primeiru-Ministru, Kay Rala Xanana Gusmão, horiseik loron 15 fulan-janeiru tinan 2024, halo viajen ba Suisa, hodi partisipa iha Forum Ekonómiku Mundiál ba da-54, ne'ebé sei hala’o husi loron 15 to'o loron 19 fulan-janeiru tinan 2024, iha Davos.

Forum Ekonómiku Mundiál ne’e, iha ninia edisaun da-54, sei haree liu iha kestaun fundamentál sira ne'ebé afeta mundu ne'ebé iha nafatin transformasaun, hosikedas krize seguransa to’o alterasaun klimátika no intelijénsia artifisiál. Hodi hatán ba erozaun konfiansa, presiza kria plataforma diálogu ne'ebé forte liu, parseria ne’ebé metin, kuadru polítika ne'ebé ájil (book-an lalais) no implementasaun teknolojia ne’ebé efikás atu alkansa benefísiu ne’ebé prátiku no bele implementa ba sosiedade, tantu iha prazu badak no prazu naruk. 

Ho tema "Harii Filafali Konfiansa", eventu ne'e sei iha diálogu abertu ida entre país no stakeholder sira, ne’ebé halibur lider governu, empreza, no sosiedade sivíl sira atu buka solusaun ba dezafiu globál. Ho partisipasaun governu hamutuk 100 resin, organizasaun internasionál, empreza parseiru no lider sosiedade sivíl, programa ne’e sei ko’alia kona-ba prioridade temátika haat ne'ebé interligadu: seguransa no kooperasaun globál, kreximentu ekonómiku no empregu, intelijénsia artifisiál no estratéjia longu prazu ba klima, natureza no enerjia. Iha eventu ne'e, sei diskute mós asuntu krusiál kona-ba tipu lideransa ida-ne'ebé presiza iha ambiente ne'ebé kompleksu no nafatin iha mudansa, no sei inklui servisu no diskusaun hotu-hotu.

Aleinde atividades iha Forum Ekonómiku Mundial, Primeiru-Ministru sei iha sorumutuk ho lider mundiál sira atu diskute no hametin kooperasaun bilateral.

Xefe Governu durante dezlokasaun ba Suisa, sei akompaña husi delegasaun ida husi Ministériu Negósius Estranjeirus no Kooperasaun, no tuir ajenda sei fila mai Timor-Leste iha loron 20 fulan-janeiru 2024.