Governu Timor-Leste

Primeiru-Ministru, Kay Rala Xanana Gusmão, hala’o sorumutuk ho Ministru Florestas Repúblika Koreia nian, Nam Sung Hyun, hodi diskute kooperasaun bilaterál iha área reflorestasaun, ba plantasaun ai-hun ho objetivu atu prezerva foho sira no kombate rai-maran iha Timor-Leste. Enkontru ne’e hala’o iha loron 11 fulan-janeiru, iha Palásiu Governu, Dili.

Xefe Governu hato’o ninia satisfasaun kona-ba parseria ida-ne’e ho Koreia no esplika katak Ministériu Agrikultura, Pekuária, Peska no Florestas, hamutuk ho Sekretáriu Estadu Florestas, sei prepara planu dezenvolvimentu ida ba projetu ida-ne’e, ne’ebé sei hahú iha tinan 2025. 

Dezenvolvimentu hosi planu ida-ne’e sei konta ho apoiu hosi espesialista koreanu sira iha área reflorestasaun hodi avalia espésie sira ne’ebé adekuadu liu ba nasaun ne’e no área sira ne’ebé di’ak liu hodi halo plantasaun.

Governante koreanu ne’e hateten katak, liuhosi kooperasaun ida-ne’e, Koreia hakarak fahe ninia esperiénsia durante tinan 50 iha área reflorestasaun no prezervasaun florestál.

Primeiru-Ministru mós hato’o agradesimentu ba Governu no ba setór privadu koreanu sira ba oportunidade ne’ebé oferese ona ba timoroan rihun ba rihun hodi hetan kompeténsia no esperiénsia foun sira serbisu nian iha Koreia Súl, liuhosi programa kooperasaun laborál. 

Enkontru ne’e konta ho prezensa hosi Ministru Agrikultura no Peskas, Marcos da Cruz, Sekretáriu Estadu Florestas, Fernandinho Vieira, Embaixadór Koreia Súl nian iha Timor-Leste, Shin Man Taek, no reprezentante sira hosi Ministériu Negósius Estranjeirus no Kooperasaun.