Governu Timor-Leste

Primeiru-Ministru, Kay Rala Xanana Gusmão, hala’o konsulta Planu Estratéjiku Dezenvolvimentu Nasionál (PEDN), iha sub-distritu Lolotoe, Distritu Bobonaro.

Populasaun sub-distritu Lolotoe, dahuluk simu Primeiru-Ministru, Kay Rala Xanana Gusmão, ho hatais kultura Lolotoe nian, hafoin Administradór distritu Bobonaro no Administradór sub-distritu Lolotoe, akompaña ba to’o iha lia-nain hodi hamulak ho kari aifunan hosi labarik sira ba iha Primeiru-Ministru nia ulun hodi hakilar viva Maun Bo’ot  no viva Aman Dezenvolvimentu.

Hafoin ne’e komitiva akompaña ho formatura lia-nain sira, bandeira hosi suku no tebedai  hodi ba to’o iha fatin konsulta PEDN.

Administradór sub-distritu Lolotoe, Nicolau Monis, hato’o kondisaun jeográfika sub-distritu Lolotoe nian ba iha Primeiru-Ministru katak, Lolotoe iha Suku 7 no aldeia 20, mane 3,425, feto 3,567, totál 6,992 no xefe família 1,512, hosi populasaun ida ne’e 90% móris iha agrikultura no 10% hanesan funsionáriu.*

Sub-distritu Lolotoe halo baliza: norte ho sub-distritu Suai Vila, sul ho Kabupaten Belu, Atambua (RI), leste ho sub-distritu Bobonaro no oeste baliza ho Sub-Distritu Mau-Katar / Suai. Luan sub-distritu Lolotoe 169 Km^2.*

Iha aprezentasaun Administradór sub-distritu Lolotoe iha fronteira, hato’o rekomendasaun ba Primeiru-Ministru atu aumenta personil polisia iha sub-distritu refere tanba iha ema nain neen de’it difisil atu kontrola fatin hotu-hotu, aumenta funsionáriu pesoál saúde, liu-liu parteira tanba iha sub-distritu iha parteira ida de’it ne’ebé difisil atu atende inan-feton sira ne’ebé isin-rua, harii eskola sekundária ida iha Lolotoe atu bele fasilita povu nia oan sira iha baze, hadi’a estrada tanba estrada mak hanesan meu ida-ne’ebé bele fasilita komunidade hodi hetan transporte atu ba fa’an produtu lokál, eletrisidade, bee-mós no saneamentu no replantasaun ba kafé.

Nune’e, lider komunitáriu sira mós hato’o povu nia preokupasaun mak hanesan, estrada, bee-mós, eletrisidade no uma ba ferik no katuas sira.

Relasiona ho kestaun sira ne’e, Primeiru-Ministru, Kay Rala Xanana Gusmão, hateten katak, Ukun A’an ida ne’e ho pregu, presija halo reflesaun ba iha ukun A’an ida ne’e tanba ema barak nia mate, isin dodok iha foho leten, mota kuak no fatin hotu-hotu no timór-oan hatudu ona brani hodi halo funu, nune’e Estadu iha obrigasaun atu haree oinusá ho móris povu nian ba oin.

Tanba ne’e Governu iha osan ba tinan 2011 to’o tinan 2030, atu hadi’a estrada nasionál, rejionál no rurál sira, tanba preokupasaun sira ne’e hotu mak sai hanesan infraestrutura bázika.

Aleinde ne’e mós Xanana Gusmão, afirma tan katak, preokupasaun sira ne’e hotu tau ona iha planu estratéjiku 2020 no hatutan iha PEDN mak ohin hau mai atu halo konsulta ho povu sub-distritu Lolotoe.

Akompaña Primeiru-Ministru iha konsulta PEDN mak hanesan, Pe. Paróquia Lolotoe ho Vigáriu, Madre sira, Ministru Saúde, Nelson Martins, Ministru Administrasaun Estatál Ordenamentu Teritóriu, Arcângelo Leite, Sekretáriu Estadu Pekuáriu, Valentino Varela, Sekretáriu Estadu Dezastre Naturál, Jacinto Rigoberto, Sekretáriu Estadu Agrikultura, Marcos da Cruz no Sekretáriu Estadu  Obras Públikas, Domingos Caeiro.

* Tuir dados husi OCHA, Timor-Leste District Atlas, versaun 02, fulan Agistu, tinan 2008 (Hare’e iha internet).