“Kultura mak lori ita ba ukun rasik-an”

Ses. 30 jullu 2010, 15:50h
Maucatar_PORTAL

“Hau haksolok tebes hodi tau atensaun duni ba kultura tanba kultura mak lori ita ba ukun rasik-an. Tanba ne’e hau sei la esplika kona-ba kultura iha planu ida ne’e, maibé sei tau nafatin prioridade ba kultura.” Primeiru-Ministru, Kay Rala Xanana Gusmão, hateten iha konsulta PEDN iha sub-distritu Maucatar, loron 19 fulan Jullu 2010.

Xefe ezekutivu hateten lia sira ne’e bainhira rona intervensaun hosi reprezentante lia-nain hosi sub-distritu Maucatar, Atanásio Francisco Tavares, ne’ebé husu ba Primeiru-Ministru tau konsiderasaun kultura iha mós PEDN. Tanba ita ukun-an tinan 10 ona seidauk iha atensaun ba kultura. Nia fó ezemplu “katuas sira ne’ebé hatais tais no kesi hena mutin iha ulun hodi hein atu simu Primeiru-Ministru, maibé ohin iha aprezentasaun Administradór nian haluha atu temi.”

Aleinde ne’e Atanásio hatutan katak “lia-fuan ne’ebé ema barak iha mundu ne’e sempre temi no Maucatar oan sira dehan “Bai Bom Tuek, Ton Tolik Tane” (Todan ita hotu hasa’an, kma’an ita hotu senti) hodi fó hela ba Primeiru-Ministru atu lori, hodi hare’e mós ba importánsia hosi ita nia kultura.”

Iha fatin hanesan Administradór sub-distritu Maucatar, José Pina Cardoso, iha nia diskursu hateten katak “Administrasaun sub-distritu Maucatar kompostu hosi suku 8, aldeia 22 ho totál populasaun 5,876 ho nia luan 114 km2 no hosi parte norte baliza ho Fatululik, Fohorém. sub-distritu refere iha nia riku-soin mak hanesan, mina-rai, aikameli, kami’i, batar, fore mungu no ai-farina”.*

Hahú hosi Governu anteriór to’o IV Governu Konstituisionál, seguransa iha sub-distritu Maucatar la’o hanesan bainbain no problema ne’ebé mak sira hasoru mak bé mos eletrisidade, saúde, edukasaun no telekomunikasaun nomós populasaun maioria moris nu’udar agrikultór. Nia hatutan katak estrada ligasaun hosi sub-distritu ba to’o suku mak lahadia sei fó impaktu ba desenvolvimentu nasaun ne’e nian.

Vizita ne’e akompaña hosi Sekretáriu Estadu Ambiente, Abilio Lima, Diretór Jerál Orsamentu Estadu, Ministériu Finansas, Francisco da Costa Soares nomós hetan partisipasaun másimu hosi entidade sira tomak iha sub-distritu Maucatar.

 

* Tuir dados husi OCHA, Timor-Leste District Atlas, versaun 02, fulan Agistu, tinan 2008. (Hare’e iha internet)

   Ba leten