Governu Timor-Leste

Primeiru-Ministru, Kay Rala Xanana Gusmão, hateten “atu hadia infra-estrutura báziku hanesan estrada, be’e mos, eletrisidade, uma no telekomunikasaun tenki muda sistema, tanba ne’e governu agora iha ona sistema atu halo kontrusaun projetu infra-estrutura bázika iha sub-distritu ida nia laran, emprezáriu sira ne’e tenki mai duni hosi Sub-distritu refere (ezemplu Zumalai) atu nune’e bele iha responsabilidade hodi dezenvolve sira nia sub-distritu,” hateten Xefe Governu ne’e bainhira halo konsulta públika kona-ba PEDN iha sub-distritu Zumalai, distritu Kovalima, loron 17 fulan Jullu 2010.

Xefe IV Governu Konstitusionál hateten lia-fuan sira ne’e, hafoin rona relatóriu badak hosi Administradór sub-distritu Zumalai no intervensaun hosi lider komunitáriu sira ne’ebé husu atensaun Governu nian ba prioridade dezenvolvimentu kurtu prazu iha sub-distritu Zumalai hanesan; konstrusaun ponte Raimea, ke’e mota mola, hadia saneamentu, konstrusaun uma ba povu, reabilitasaun uma eskola pré-sekundária Belaco, troka jeradór eletrisidade nian, hadia rede telekomunikasaun no tau alkatraun iha estrada hosi Cassa Ainaro to’o Salele no hosi Zumalai to’o Bobonaro.

Iha oportunidade hanesan Administradór sub-distritu Zumalai hato’o mós kona-ba demografia sub-distritu Zumalai, ne’ebé ho nia luan 283 km², divizaun administrativa, iha suku 8, aldeia 34 ho nia populasaun hamutuk 13,323, ne’ebé mane hamutuk 6,724 no feto hamutuk 6,599, xefe familia iha 3,015, membru konsellu suku sira hamutuk 124.*

Akompaña vizita Primeiru-Ministru nian ne’e, Ministru Infra-Estrutura, Pedro Lay, Sekretáriu Estadu Obras Públikas, Domingos Caeiro, Sekretáriu Estadu Ambiente, Abilio Lima no Diretór Jerál Orsamentu Estadu, Francisco da Costa Soares.

* Tuir dados husi OCHA, Timor-Leste District Atlas, versaun 02, fulan Agistu, tinan 2008 (Hare’e iha internet).