Governu asina ona kontratu ba rekualifikasaun no espansaun Aeroportu Dili nian

Kua. 31 maiu 2023, 02:20h
WhatsApp Image 2023-05-30 at 15.14.15

Primeiru-Ministru, Taur Matan Ruak, hamutuk ho Prezidente Repúblika, José Ramos Horta, ohin, loron 29 fulan-maiu tinan 2023, iha Ministériu Transportes no Komunikasaun, sai testemuña ba eventu importante serimónia asinatura kontratu rekualifikasaun no espansaun ba Aeroportu Internasionál Prezidente Nicolau Lobato, entre Ministru Transporte no Komunikasaun, José Agostinho hanesan dono projetu ho responsável hosi Kompañia manan na’in hosi Indonézia PT. Waskita Karya (Persero)TBK no ho Kompañia konsultór hosi Indonézia, PT Amythas IN JV ho Meinhardt PCM.

Asina mós ho Kompañia Konsórsiu hosi Japaun, Japan Airport Consultants, INC, Ehira Architects and Engineers, INC, Oriental Consultants Global CO, LTD no Nippon Koei CO, LTD ne’ebé sei responsabiliza ba DED, konstrusaun terminal pasajeiru nian no konsultoria.
Enkauntu Kompañia Waskita Karya, sei responsabiliza ba halo konstrusaun pista atual hosi 1850m ba 2,100m, táxi way, torre kontrolu no zona parkeamentu ba aeronaves.

Ministru Transporte no Komunikasaun, José Agostinho iha diskursu hateten, ho lideransa Primeiru-Ministru Taur Matan Ruak nian, VIII Governu Konstitusionál halo esforsu lubuk boot hakat pasu importante ida ba oin iha melloramentu ba sistema infraestrutura AIPNL nian hanesan odamatan boot Timor-Leste nian tuir padraun Internasionál.

Espansaun pista Aeroportu ne’e, sei halo iha faze tolu. Faze dahuluk , sei dada hosi pista atual 1,850 metru ba 2,100 metru, faze daruak sei dada tan 400 metru ba parte tasi, sai naruk 2,500 metru no faze datoluk sei dada tan 500 metru hodi atinje 3,000 metru, atu bele akumula aviaun ho kapasidade boot sira.

Hola parte iha Serimónia refere, Embaixadór Indonésia iha Dili, Embaixador Japaun iha Dili, Reprezentante Embaixada Austrália, Reprezentante ADB iha Timor-Leste, reprezentante IFC iha Timor-Leste, membru Governu no entidade importante sira seluk.

   Ba leten