Governu Timor-Leste

Primeiru-Ministru, Taur Matan Ruak, partisipa iha serimónia lansamentu empreza Orijen Timor, iha loron 7 fulan-fevereiru tinan 2023, iha sidade Kamberra, iha Austrália.

Projetu Orijen Timor, ho objetivu atu liga produtór kafé timoroan ho empreza importasaun, tratamentu, torrefasaun no distribuisaun ba kafé orgániku sira ho kualidade, iha merkadu australianu no rejionál, hodi promove interkámbiu ba produtór, distribuidór no konsumidór sira.

Serimónia ne’e konta ho partisipasaun husi ko-diretór no fundadór sira empreza Orijen Timor, hanesan: Habib Maarbani, husi Project Origin (responsavel ba selesaun kafé orijen kontrolada), Gobie Rajalingam, Daniel Leong no Troy Huckstepp, veteranu ida husi Kuartu Batallaun Rejimentu Real Austrália nian, ne’ebé sai mós hanesan promotór boot ida ba Kafé orijen timoroan nian.

Serimónia ne’e konta ho prezensa Ministra Negósius Estranjeirus no Kooperasaun Timorense, Adaljiza Magno, embaixadora Timor-Leste iha Kamberra, Inês Almeida no Embaixadór Austrália nian iha Timor-Leste, Bill Costello. Eventu ne’e konta mós ho konvidadu lubun boot ida husi komunidade lokál, liuliu ba Membru Grupu Amizade sira ho Timor-Leste.

Projetu ne’e, aleinde divulga kafé orgániku ne’ebé ho kualidade kontrolada, Timor-Leste, mós divulga ona antesedente istória íbridu Timor-Leste nian, espésie ida ne’ebé halo ligasaun jenétika entre kafé Arábika no Robusta.

Kona-ba ida-ne’e, destaka ona papél íbridu ida-ne’e iha tinan limanulu, sékulu liubá, atu salva ai-horis kafé husi moras ida ne’ebé koñesida hanesan moras ferrujen kafé (coffee rust) ne’ebé estraga plantasaun kafé iha mundu tomak.

Ita hatene katak, kafé ne’ebé ohin loron ita hemu iha kontinente hotu-hotu, mai husi íbridu timor, koñesidu ho naran téknika hanesan Catimor, ka Sarshimor iha Brasil.

Serimónia ne’e mós konta ho aprezentasaun balun kona-ba atividade sira ne’ebé realiza husi Orijen Timor, iha fatin oioin iha Timor-Leste, nune’e mós kona-ba programa formasaun ne’ebé hala’o ho joven Timoroan sira iha Austrália ne’ebé ninia programa foin-lalais ne’e hahú.

Atu hetan liután informasaun, bele konsulta iha pájina Projetu Orijen Timor nian iha facebook: https://www.facebook.com/orijemtimor