Governu Timor-Leste

Ministru Obras Públikas, Abel Pires da Silva, akompaña husi Prezidente Institutu Jestaun Ekipamentu no Apoiu ba Dezenvolvimentu Infraestrutura (IJEADI), Hermenegilda da Costa Laurentina, lansa iha loron 15 fulan-janeiru tinan 2023, brigada neen IJEADI nian ba dezenvolvimentu, manutensaun no reabilitasaun infraestrutura iha rejiaun nasionál oioin.

Ekipa neen hosi IJEADI maka Brigada Daitula, ne’ebé sei halo servisu iha munisípiu Baucau, Lautein no Vikeke, Brigada Rosa Muki, ne’ebé sei hala’o iha munisípiu Manatutu, Manufahi no Ainaro, Brigada Maria Tapo, sei hala’o servisu iha munisípiu Bobonaru, Ermera no Covalima, Brigada Samba 9, ne’ebé sei servisu iha Munisípiu Likisá, Aileu no Dili, Brigada Sebastião Gomes sei funsiona hanesan brigada rezerva hodi apoia servisu emerjénsia sira, no ikusliu, Task Force Operasionál ida, ne’ebé sei sai nu’udar responsavel ba jestaun makinaria, liuliu niveladora, retroeskavadora, kamiaun baskulante, autotanke ba bee, autotanke ba kombustivel no mákina sira ne’ebé iha ona hodi halo manutensaun  ba estrada aat sira.

Iha ninia intervensaun, Ministru Obras Públikas hato’o ninia “satisfasaun, orgullu no priviléjiu bele servisu ho ekipa téknika IJEADI nian, ne’ebé maka forte tebes iha apoiu ba área infraestrutura, liuliu kona-ba estrada sira” no fó “apresiasaun pozitiva ba servisu no ba progresu sira ne’ebé Institutu Públiku ida-ne’e alkansa ona”.

Ministru Abel Pires da Silva esplika ona katak objetivu husi desizaun ne’e hodi tau naran erói nasionál sira ba brigada sira atu “sira-nia dedikasaun sai hanesan ezemplu ba aprendizajen”, “ atu ita kontinua  serbí ita-nia país hodi lori ho ita sira-nia espíritu, dedikasaun no sakrifísiu iha prosesu foun ida ba dezenvolvimentu”.

Prezidente IJEADI ne’e, iha ninia intervensaun lembra katak nia akompaña ona, “hosikedas tinan 2016, hanesan funsionária, transformasaun IGE nian, hosi momentu ne’ebá iha Diresaun Nasionál ida de’it iha Ministériu Obras Públikas, to’o ohin loron, ne’ebé sai ona Institutu Públiku ida, ho estatutu rasik” no agradese “ ba estrutura IJEADI, husikedas estabelesimentu instituisaun to’o ohin loron no ba tékniku sira hotu ne’ebé halo esforsu boot ida hodi serbí no atende preokupasaun populasaun nian.

Hermenegilda da Costa Laurentina afirma mós katak “IJEADI ne’e konsege apoia no halo ona buat barak ba Timor-Leste laran tomak, maibé seidauk bele halo hotu” tanba ne’e nia hato’o ninia dezeju katak “mákina sira ne’ebé Governu sosa ona iha tinan kotuk no ho aumentu kapasidade IJEADI nian ita sei bele halo liután, tuir planu prioridade no ho pedidu urjente husi ita-nia komunidade”.

Serimónia lansamentu ne’e konta mós ho prezensa hosi Prezidente EDTL, EP., Paulo da Silva, Prezidente ANAS, IP., Domingos Pinto, Vise-Prezidente BTL, EP., Gustavo da Cruz, vogál sira hosi IJEADI nune’e mós tékniku sira hotu no funsionáriu sira IJEADI  nian.