Votu pezar ba Shirley Shackleton nia mate

Prezidénsia Konsellu Ministrus

VIII Governu Konstitusionál

...........................................................................................................................

loron 16, fulan-janeiru, tinan 2023

Komunikadu Imprensa

Nota Pezar ba Falesimentu husi Shirley Shackleton

Ho laran triste tebes no sentimentu ne’ebé kle’an, bainhira Governu Repúblika Demokrátika Timor-Leste simu notísia kona-ba Shirley Shackleton nia mate, feto-faluk husi jornalista Greg Shackleton, jornalista ida ne’ebé koñesidu hanesan Balibo Five, ne’ebé oho husi forsa indonézia sira iha Balibó, iha loron 16 fulan-outubru tinan 1975.

Shirley Shackleton mate horiseik, loron 15 fulan-janeiru, iha Melbourne, hafoin moras kleur.

Shirley Shackleton, moris iha loron 26 fulan-dezembru tinan 1931 iha Plympton, Adelaide, iha Austrália.

Hafoin nia la’en, Greg Shackleton, jornalista australianu, ne’ebé asasinadu iha Balibó, iha loron 16 fulan-outubru tinan 1975, hamutuk ho jornalista na’in haat seluk. Shirley husik ninia vida hodi defende autodeterminasaun Povu Timoroan nian no luta ba lia-loos kona-ba sirkunstánsia oho jornalista na’in-lima ne’e.

Shirley Shackleton hanesan Diretora ba Balibó House Trust, organizasaun ida-ne’ebé nia ajuda ona hodi estabelese, responsavel ba rekuperasaun Australian Flag House, ba projetu sosiál oioin iha Balibó no ne’ebé fó omenajen memoria jornalista na’in-lima nian – australianu Greg Shackleton no Tony Stewart, britániku Malcolm Rennie no Brian Peters no mós neozelandés Gary Cunningham.

Iha tinan 2010, nia hakerek ona livru “Sírkulu Silénsiu: Testemuñu Pesoál Molok, Durante no Hafoin Balibó”.

Iha tinan 2013, hanesan rekoñesimentu ba ninia kontributu ne’ebé boot ba benefísiu Timor-Leste no timoroan nian, Shirley kondekora ona ho Medalla Orden Timor-Leste.

Primeiru-Ministru, Taur Matan Ruak, hato’o ninia “kondolénsia ne’ebé kle’an ba família sira saudoza Shirley Shackleton nian” no afirma ona katak “ninia lakon ne’e mós hanesan Timor-Leste nia lakon”.

Portavós Governu Konstitusionál VIII, Ministru Fidelis Magalhães, lori Governu Timor-Leste no povu timoroan nia naran, hato’o kondolénsias ba família no belun sira Shirley Shackleton nian no afirma katak “ninia lian hodi defende povu timoroan no amizade ne’ebé koloroza no mós ninia apoiu kontínuu iha luta ami sei la haluha”. REMATA

 

 

   Ba leten