……………………………………………………………………………………………………………
loron 2, fulan-dezembru, tinan 2022
Komunikadu Imprensa
Governu hato’o kondolénsia ba eis-Prezidente xinés Jiang Zemin nia mate
Ho laran triste tebes Governu Timor-Leste simu notísia kona-ba eis-Prezidente Repúblika Populár Xina nian, Jiang Zemin nia mate, ho idade 96.
Jiang Zemin mate iha kuarta-feira ida-ne’e, iha loron 30 fulan-novembru tinan 2022, iha Xangai, tanba leusemia no falénsia múltipla husi nia órgaun sira.
Jiang Zemin nu’udar Prezidente Repúblika Populár Xina nian hosi tinan 1993 to’o tinan 2003 no nu’udár Sekretáriu-Jerál Partidu Komunista Xina nian hosi tinan 1989 to’o tinan 2002.
Iha ninia karta ne’ebé dirije ba Prezidénsia Repúblika Timor-Leste, ba okaziaun Restaurasaun Independénsia Nasionál, iha fulan-maiu tinan 2022, Jiang Zemin lembra katak “amizade tradisionál entre povu Xina no povu Timor-Leste metin ona husi kedas iha tempu uluk liubá” hanesan rezultadu husi “interkámbiu no kooperasaun iha área polítika, ekonómika, komersiál no área sira seluk”, no nia manifesta ninia vontade “hodi serbisu la hatene kolen atu nafatin promove lasu viziñu ne’ebé di’ak no amizade no kooperasaun entre Xina no Timor-Leste”.
Primeiru-Ministru, Taur Matan Ruak, destaka ona “ninia papél iha abertura Xina nian ba Mundu no ba merkadu globál sira, ne’ebé hodi transforma país sai poténsia mundiál ida”.
Portavós Governu nian, Ministru Fidelis Magalhães, lori Konsellu Ministrus no Governu tomak nia naran, hato’o ninia “kondolénsia ne’ebé kle’an ba Governu xinés no ba Povu tomak hosi Repúblika Populár Xina, no liuliu ba komunidade xineza tomak iha Timor-Leste”. REMATA