Governu Timor-Leste

Institutu Nasionál Dezenvolvimentu Maundobra organiza hela konferénsia internasionál ida ho tema “hasa’e kualidade no inkluzaun edukasaun nian no formasaun tékniku no profisionál iha Timor-Leste ba dezenvolvimentu nasionál”. Eventu ne’e hala’o ohin no aban, iha salaun Oka Surikmas, Dili.

Konferénsia ne’e konta ho apoiu husi programa australianu APTC (Australia Pacific Training Coalition) no partisipasaun husi Asosiasaun Otél Na’in Timor-Leste (HOTL-Hotel Owners of Timor-Leste).

Primeiru-Ministru, Taur Matan Ruak, iha ninia diskursu ba abertura eventu ne’e, manifesta ninia laran-ksolok hodi partisipa iha konferénsia ida-ne’e, ne’ebé ho objetivu atu hetan dalan hodi hasa’e kapasidade no inkluzaun maundobra Timor-Leste ba merkadu traballu ohin loron nian, ne’ebé presiza maundobra ida ne’ebé kualifikada no espesializada.

Xefe Governu ne’e mós defende katak “ita tenke iha vizaun”, tanba “ita haree buat rua mak muda ona kompletamente, ne’ebé influensia totalmente no provoka transformasaun estruturál ida ne’ebé boot kona-ba empregu, ida maka globalizasaun no ida seluk maka difuzaun teknolojia nian iha sosiedade”. “Ohin loron, ita la moris sein telefone ou sein komputadór, tanba ne’e ita-nia formasaun profisionál tenke bazeia ba ezijénsia mundu ohin loron nian.

Konferénsia internasionál ida-ne’e konta ho partisipasaun husi Ministru Koordenadór Asuntus Ekonómikus, Joaquim Amaral, Ministru Edukasaun, Juventude no Desportu, Armindo Maia, Ministru Ensinu Superior, Siénsia no Kultura, Longuinhos dos Santos, Vise-Ministru Finansas, António Freitas, Vise-Ministra Solidariedade Sosiál, Signi Chandrawati Verdial, Sekretáriu Estadu Formasaun Profisionál no Empregu, Alarico do Rosário, Embaixadór Austrália nian iha Timor-Leste, Bill Costello, parseiru dezenvolvimentu  sira no reprezentante sira sosiedade sivíl nian.