Governu Timor-Leste asina akordu resiprosidade kona-ba rai no propriedade ho Estadus Unidus Amérika

Ses. 12 agostu 2022, 12:11h
298880639_375820078069381_4220720565730371829_n

Ministru Justisa, Tiago Amaral Sarmento, lori Governu Timor-Leste nia naran, asina ona akordu tempu naruk ida kona-ba permuta diplomátika rai no propriedade entre Governu Timor-Leste no Governu Estadus Unidus Amérika, ne’ebé reprezenta husi Enkarregadu Negósius Embaixada amerikana nian iha Timor-Leste, Tom Daley. Serimónia asinatura ne’e hala’o iha Ministériu Negósius Estranjeirus, iha sesta-feira loron 12 fulan-agostu tinan 2022, iha Dili.

Iha tempu hanesan, akordu ne’e hetan mós asinatura iha Novaiorke husi Embaixadór Timor-Leste nian iha Estadus Unidus Amérika, Isílio Coelho no Reprezentante Permanente Timor-Leste nian ba Nasoins Unidas, Karlito Nunes.

Tuir akordu ida-ne’e, Governu Estadus Unidus mantein direitu hodi utiliza rai ba ninia Embaixada iha Dili, durante tinan 50, iha posibilidade atu renova ba tinan 50 tan. Governu Timor-Leste sei iha instalasaun foun ba ninia Embaixada iha Washington no ba ninia misaun iha Organizasaun Nasoins Unidas iha Novaiorke.

Tuir restrisaun sira ne’ebé prevee ona iha akordu ne’e, hodi konsidera planu atu loke tan Aeroporto Internacional Presidente Nicolau Lobato, Estadus Unidus bele harii edifísiu foun ida, ho altura la aas liu metru 35 husi nivel-tasi.

Ministru Tiago Amaral Sarmento hateten katak “ne’e ba dahuluk asina akordu ida hanesan ne’e” no “hein katak iha futuru akordu ne’e mós bele halo ho nasaun sira seluk”.

Governante ne’e mós hateten katak “akordu ida-ne’e sei haforsa liután lasu amizade no kooperasaun entre nasaun rua ne’e, ho prinsípiu igualdade no partilla igualitária nian”.

Enkarregadu Negósius Embaixada amerikana nian afirma katak “asinatura ba akordu ida-ne’e hanesan garantia importante ida ba kompromisu tempu naruk nian [Estadus Unidus] ho Timor-Leste”.

 

   Ba leten