Integra vasinasaun COVID-19 nian ho imunizasaun rotina
Ministériu Saúde, ho apoiu husi Organizasaun Mundial Saúde nian no parseiru sira seluk, iha loron 11 fulan-agostu konklui ona semináriu loron tolu ho profisionál saúde husi munisípiu sira hotu, ho objetivu atu kompleta vasinasaun COVID-19 nian ho imunizasaun rotina, hanesan sarampu, rubéola, BCG, Hepatitis B no seluk tan. Semináriu ne’e hala’o iha Centro de Convenções de Baucau.
Inisiativa ida-ne’e ho nia objetivu atu rekupera impaktu negativu sira ne’ebé kauza husi pandemia COVID-19 iha atividade sira imunizasaun rotina nian.
Ministra Saúde, Odete Maria Freitas Belo, destaka ona katak presiza urjente atu aumenta kuantidade rekursus umanus ba programa saúde iha família hodi aumenta kobertura vasinasaun nian iha país. Odete Belo mós agradese ba apoiu husi parseiru sira, hanesan USAID, OMS, UNICEF, UNFPA, ne’ebé hamutuk ho Governu garante ona apoiu tomak ba labarik no inan sira iha Timor-Leste.
Reprezentante OMS nian iha Timor-Leste, Arvind Mathur, hateten katak ho abordajen ida ne’ebé integrada, vasina hotu-hotu ba grupu sira ne’ebé ho idade lahanesan bele fornese husi grupu profisionál saúde ida de’it “Ida-ne’e mak oportunidade ida ne’ebé atu otimiza rekursu sira no adekuadu hodi konsidera integrasaun vasinasaun COVID-19 nian ho imunizasaun rotina, hanesan dalan ida ne’ebé efikás no efisiente”, nia hatutan.
