Governu Timor-Leste

Primeiru-Ministru, Taur Matan Ruak, ohin, loron 8 fulan-agostu, iha Palásiu Governu, simu atleta nasionál sira ne’ebé partisipa iha ASEAN Para Games 2022 ne’ebé lori medalla 12, medalla osan-mean lima, osan-mutin rua no bronze lima. Edisaun ba eventu tinan ida-ne’e nian hala’o iha Solo, iha Indonézia.

ASEAN Para Games hala’o tinan rua dala ida (bienál), nu’udar eventu multidesportivu ida ne’ebé kompete de’it husi atleta sira sudeste aziátiku nian ho defisiénsia fízika, mentál ka sensoriál.

Kompetisaun ne’e hala’o iha loron 30 fulan-jullu to’o loron 6 fulan-agostu tinan 2022 no hetan partisipasaun husi atleta 1.648 husi nasaun sudeste aziátiku 11 (Brunei, Kamboja, Indonézia, Laos, Malázia, Myanmar, Filipina, Singapura, Tailándia, Timor-Leste no Vietname).

Xefe Governu iha nia intervensaun, hato’o ninia sentimentu kontente “tanba simu atleta sira ne’ebé fila mai lori rezultadu ida ne’ebé pozitivu tebes “no hateten “Ita-boot sira maka orgullu nasaun no povu timoroan nian”

Primeiru-Ministru garante katak “Governu sei kria kondisaun sira hodi kontribui atu nune’e prestasaun sira-ne’e di’ak liután”.

“Ha’u lori Governu VIII, Estadu timoroan no povu Timor-Leste nia naran, hato’o ha’u-nia respeitu ba Ita-boot sira no ha’u fó parabens ba Ita-boot sira, tanba Ita-boot sira hisik ita-nia bandeira ba mundu”, “ne’e hatudu katak, iha esforsu, sentimentu ida ne’ebé hamutuk, dedikasaun no tanba ne’e Ita-boot sira mak sai hanesan referénsia ida mai ami hotu, hahú husi ha’u, Primeiru-Ministru, to’o ita-nia sidadaun sira”, dehan Xefe Governu.

Aleinde Primeiru-Ministru, atleta no treinadór sira, partisipa mós iha serimónia ida-ne’e, Ministru Edukasaun Juventude no Desportu, Armindu Maia no Sekretáriu Estadu Juventude no Desportu, Abrão Saldanha.