Governu Timor-Leste

Ministru Finansas, Rui Gomes, reprezenta Governu Timor-Leste, no Embaixadór Austrália iha Timor-Leste, Bill Costello, ohin, loron 4 fulan-agostu, tinan 2022, iha Auditóriu Ministériu Finansas sei asina Akordu Subsidiáriu ho montante millaun $25 ba Programa Parseria ba Prosperidade Inkluzivu (PROSIVU) Faze Dahuluk ne’ebé sei implementa durante tinan haat to’o fulan-juñu 2026.

Programa PROSIVU ho valór kontribuisaun millaun $25 sei ajuda Governu hodi konsentra iha área importante tolu: Reforma Administrasaun Públiku, Dezenvolvimentu Ekonómiku no Reforma Jestaun Finansas Públikas, ajenda reforma importante ida ne’ebé mak inísia ona desde tinan 2015 husi Governu da-6 no Governu Konstitusionál da-8 komprometidu hodi kontinua implementa.

“Programa Parseria Ba Prosperidade Inkluzivu, PROSIVU, lori esperansa, motivasaun no kompromisu foun husi ami-nia Parseirus Dezenvolvimentu hodi hadi’ak dezempeñu ami-nia servisus públiku ne’ebé sei fó impaktu profunda ba populasaun sira-nia moris,” Ministru Rui Gomes hateten. “Husi parte Ministériu Finansas, ami prontu atu simu apoiu sira hodi hametin liután Reforma Jestaun Finansas Públikas, espesialmente servisu besik liután ho Diresaun sira ne’ebé mak envolve iha Planeamentu no Orsamentasaun, Tributária no Aduaneira atu nune’e Ministériu bele ezerse nia funsaun tuir mandatu. Ami mós espera Programa PROSIVU sei kontinua apoiu ami-nia Planu Rekuperasaun Ekonómiku 2020,” Ministru Rui Gomes konklui. 

Hafoin asinatura akordu ne’e, parte rua sei hala’o Diálogu anuál kona-ba Polítika Dezenvolvimentu entre país rua. Diálogu ne’e hanesan plataforma ida ba parte rua atu diskute no hetan konkordansia kona-ba prioridade dezenvolvimentu, identifika área importante sira ne’ebé mak presiza apoiu no reflete susesu no dezafiu sira ne’ebé durante ne’e servisus Parseria ne’e enfrenta.

Tópiku diskusaun inklui Governu nia Grandes Opções do Plano 2023, prioridade Reforma Jestaun Finansas Públikas no área sira estratéjiku ne’ebé presiza apoiu husi Austrália, nomós Austrália nia Apoiu Orsamentu Direta (Direct Budget Support) ba iha Konta Tezouru Timor-Leste nian.

Iha tinan fiskál Austrália nian 2022-2023, orsamentu asisténsia dezenvolvimentu husi Austrália ba Timor-Leste aproximadamente Dolar Amerikanu millaun $73.

“Austrália no Timor-Leste nia kooperasaun ba dezenvolvimentu ne’e ampla no profunda tebes,” Ministru Finansas hateten. “Kooperasaun ne’e nu’udar parte importante ida iha ami-nia relasaun bilaterál.”

Embaixadór Austrália ba Timor-Leste hateten katak “Iha Ita-nia diálogu dezenvolvimentu bilaterál, Austrália ho Timor-Leste diskute ami-nia asisténsia ne’ebé luan. Nune’e mós dezafiu no oportunidade emerjente sira. Ne’e inklui mós oinsá atu fornese servisu ne’ebé kualidade no asesivel ba Timoroan nune’e mós programa Austrália nian ne’ebá aliña ho Grande Opsaun Planu iha prioridade enkuadramentu Governu nian”.“Ami servisu hamutuk iha área no ministériu oioin, hahú husi programa dezenvolvimentu komunitária iha baze to’o reforma polítika,” Ministru Rui Gomes hateten. “Durante COVID-19, ami-nia Parseria ne’ebé estabelese ona durante tempu naruk permite ami hodi servisu hamutuk hodi implementa Timor-Leste nia resposta ba COVID-19, fornese vasina tokon ida resin ne’ebé finansia husi Governu Australia”.