Timor-Leste sei partisipa iha Forum Rejionál ASEAN ba dala-29
Ministra Negósius Estranjeirus no Kooperasaun, Adaljiza Magno, hanesan bainaka espesiál hosi país anfitriaun Reinu Kamboja, sei partisipa iha Sorumutu Ministrus Negósius Estranjeirus ASEAN nian ba dala-55, no iha tempu hanesan partisipa mós Forum Rejionál ASEAN ba dala-29, ne’ebé sei hala’o iha Phnom Penh, Reinu Kamboja, hahú hosi loron 31 jullu to’o 06 agostu 2022.
Objetivu prinsipál sira hosi sorumutu refere atu promove dialógu konstrutivu no konsulta hodi fo kontribuisaun signifikativa ba esforsu sira atu hametin liután paz no seguransa ba interese komún, mutúa iha rejíaun Azía-Pasífiku.
lha okaziaun refere, Xefe Diplomasia timoroan ne’e sei hato'o intervensaun no aprezenta Timor-Leste nia pozisaun ba asuntu polítika no seguransa iha rejíaun Azía-Pasífiku.
lha biban hanesan, Ministra Magno sei hasoru malu mós ho ninia omólogu husi nasaun balun, no halo enkontru bilaterál ho Países Membru ASEAN no nasaun seluk sira ne’ebé partisipa iha Forum Rejionál ASEAN refere.
Ministra Negósius Estranjeirus no Kooperasaun nia viajén sei akompaña hosi Delegasaun ASEAN-MNEK, Diretora-Jerál ba Asuntu ASEAN, Milena Rangel, Diretora ba Asuntu Polítika Seguransa, Elisa da Silva no Diretór ba Asuntu Ekonomiku, Aleixo Gusmão.
Delegasaun aranka hosi Dili iha loron 29 jullu 2022 no sei fila hikas mai Dili iha loron 08 agostu 2022.
