Governu Timor-Leste

Autoridade Nasionál Petróleu no Minerais (ANPM), ohin, loron 28 fulan-jullu tinan 2022, fó-sai komunikadu ida hodi rejeita informasaun kona-ba falta kombustivel iha Timor-Leste.

Iha komunikadu ne’e, ANPM garante katak “kuantidade kombustivel (gazolina no gazóleu) ne’ebé eziste iha armazén boot rua nasionál nian, iha Pertamina Internasionál Timor SA (PITSA), iha Praia dos Coqueiros no Esperança Timor Oan, Lda (ETO), iha Hera, sufisiente atu atende nesesidade konsumidór sira iha país laran”.

ANPM Informa mós katak “oras ne’e daudaun, roo petroleiru ida atraka ona iha ponte-kais armazén kompañia nian, ne' ebé sei deskarrega, durante loron ohin. Kuantidade gazolina nian, litru millaun rua resin (millaun 2.494.372) no gazóleu litru millaun ida resin (1.6.203)”. Kompañia ETO mós informa ona, iha ninia rede sosiál katak, ETO iha kuantidade armazenada ne’ebé sufisiente.

 “Distribuidór kombustivel boot rua Timor-Leste nian, PITSA no ETO, sempre halo sira-nia importasaun tuir kalendáriu importasaun no tuir nesesidade  nasionál nian  no la iha interrupsaun ruma iha kalendáriu importasaun kombustivel nian”.

ANPM apela ba populasaun atu “labele ta'uk ho rumór no boatu sira kona-ba falta kombustivel” no hatutan katak “ho kolaborasaun di'ak husi importadór sira no postu abastesimentu hotu-hotu ANPM nian, sei kontinua hodi garante distribuisaun ida ne'ebé efetiva no efikás iha merkadu”.

Primeiru-Ministru, Taur Matan Ruak, hafoin sorumutuk semanál ho Prezidente Repúblika, garante katak “laiha razaun atu preokupa”, tanba iha sorin ida, “ ita fiar ba empreza sira ne'ebé maka halo hela sira-nia atividade” no iha sorin seluk “iha situasaun ne'ebé nesesáriu tebes Governu iha empreza estatál ida, Timor Gap, ne'ebé bele halo abastesimentu”.