Governu Timor-Leste

Lansamentu ofisiál kandidatura Timor-Leste nian ba Konsellu Direitus Umanus ONU, ba períodu tinan 2024 to’o 2026, hala’o iha loron 26 fulan-jullu tinan 2022, iha Ministériu Negósiu Estranjeiru, iha Dili.

Prosesu ba kandidatura ne’e, hahú tiha ona iha tinan kotuk, no iha fulan-janeiru tinan 2022, kandidatura ne’e aprezenta ofisiálmente iha Jenebra. Daudaun ne’e, Timor-Leste ofisiálmente hahú, ho serimónia ida-ne’e, ba ninia kampaña rekolla apoiu sira iha kandidatura ida-ne’e.

Serimónia ne’e konta ho prezensa husi Presidente Repúblika, José Ramos-Horta, membru Governu sira, Prokuradór-Jerál Repúblika, José da Costa Ximenes, reprezentante korpu diplomátiku, organizasaun internasionál no entidade nasionál sira ne’ebé relevante.

Karik eleitu, ida-ne’e hanesan ba dala uluk Timor-Leste halo parte hanesan membru Konsellu Direitus umanus nian, hodi kontribui ba promosaun direitus umanus liuhusi respeitu-malu no diálogu. Promosaun no protesaun ba direitus umanus nu’udar prioridade ida ba Timor-Leste, tantu iha nivel nasionál, nomós iha nivel internasionál.

Konsellu Direitus Umanus ne’e, hanesan órgaun ida-ne’ebé kria husi Estadu-Membru ONU nian ho objetivu atu reforsa promosaun no protesaun direitus umanus iha planeta tomak.

País 47 mak integra ba Konsellu Nasoins Unidas nian ida-ne’e, hili direta no individualmente liuhusi votu sekretu maioria husi membru Asembleia Jerál sira. Adezaun ne’e bazeia ba distribuisaun jeográfika ekuitativa, no asentu/kadeira sei distribui entre grupu rejionál sira hanesan tuirmai ne’e: Grupu Estadu Afrikanu (13); Grupu Estadu Ázia-Pasífiku (13); Grupu Estadu Europa Orientál (6); Grupu Estadu Amérika Latina no Karaíbas (8); no Grupu Europa Osidentál no Estadu seluk  (7).

Desizaun kona-ba país eleitu sira sei hatene iha fulan-outubru tinan 2023.