Timor-Leste komemora Loron Nasionál Saúde nian ho lansamentu pagamentu ba programa Bolsa da Mãe “Jerasaun Foun”

Ses. 22 jullu 2022, 16:44h
294591083_600996014715943_5716161769408684586_n

Primeiru-Ministru, Taur Matan Ruak, akompaña husi Ministra Saúde, Odete Freitas Belo, Vise-Ministra Solidariedade Sosiál no Inkluzaun, Signi Chandrawati Verdial no hosi parseiru dezenvolvimentu hala’o ona iha loron 22 fulan-jullu tinan 2022, lansamentu ofisiál hahú ho pagamentu ba programa Bolsa da Mãe “Jerasaun Foun” (jerasaun foun).

Serimónia lansamentu ne’e hala’o iha Munisípiu Ainaru no koinside ho komemorasaun ba Loron Nasionál Saúde nian ba da-8, ne’ebé ho tema “inan ho oan saudavel ba nasaun ida ne’ebé saudavel”.

Programa ida-ne’e ho ninia foku prinsipál ba primeira infánsia, ho objetivu atu redús moris-ki’ak, malnutrisaun no mortalidade infantíl.

Husikedas lansamentu faze rejistu programa ne’e nian, iha loron 17 fulan-juñu liubá, halo ona rejistu hamutuk 4,254 ba inan isin-rua, labarik husi idade zero to’o tinan tolu no labarik ho defisiénsia, iha Ainaru, Bobonaru, no Rejiaun Administrativa Espesiál Oekusi Ambenu (RAEOA). Husi valór ida-ne’e, totál kandidatura sira ne’ebé aprova ona hodi benefisia programa ne’e hamutuk 3.570.

Kada inan isin-rua sei simu osan dolar amerikanu 15 fulafulan. Labarik sira ho idade tinan tolu mai kraik sei hetan direitu fulafulan ho dolar amerikanu 20 no labarik sira ne’ebé ho defisiénsia kada fulan sei simu osan dolar amerikanu 10.

Durante fulan-jullu sei distribui ba benefisiáriu hamutuk 3.570 ho totál dolar amerikanu 68.510.

Hosi benefisiáriu hamutuk 3.570 ne’ebé rejista ona durante fulan-juñu no sei hahú simu durante fulan ida-ne’e, inan isin-rua hamutuk 647 (Ainaru 154, Bobonaru 203 no RAEOA hamutuk 290), labarik to’o tinan tolu hamutuk 2917 (Ainaru 526, Bobonaru 657 no RAEOA hamutuk 1. 734) no labarik ho defisiénsia hamutuk na’in-neen (na’in-rua husi Ainaru, ida husi Bobonaru no na’in-tolu husi RAEOA).

 Pagamentu sira ne’e sei halo liuhusi transferénsia bankária ba konta BNCTL nian no liuhusi “karteira eletrónika” T-Pay, ne’ebé depende benefisiáriu hili iha momentu halo rejistu. Ba benefisiáriu sira ne’ebé seidauk iha konta bankária, bele loke konta liuhusi programa ne’e.

   Ba leten