Governu Timor-Leste

Ohin, loron 24 fulan-juñu tinan 2022, delegasaun governamentál ida, ne’ebé lidera husi Ministru Prezidénsia Konsellu Ministrus, Fidelis Leite Magalhães nu’udar Primeiru‑Ministru em ezersísiu, hala’o sorumutuk ho Prezidente Repúblika, José Ramos-Horta, hodi diskute prioridade prinsipál sira Governu nian ba tinan 2023. Sorumutuk ne’e hala’o iha Palásiu Prezidensiál Nicolau Lobato.

Aleinde Ministru Fidelis Magalhães, iha sorumutuk ne’e partisipa mós Ministru Finansas, Rui Augusto Gomes, Ministra Saúde, Odete Maria Freitas Belo, Ministru Edukasaun, Juventude no Desportu, Armindo Maia, Ministru Ensinu Superiór, Siénsia no Kultura, Longuinhos dos Santos no Vise-Ministra Solidariedade Sosiál, Signi Chandrawati Verdial.

Sorumutuk ne’e ho objetivu prinsipál atu diskute ho Xefe Estadu kona-ba prioridade sira ne’ebé define husi Governu ba tinan 2023, no mós, atu aktuir progresu szekusaun no implementasaun kona-ba programa sira governu nian iha tinan ida-ne’e, iha nivel setór sosiál no dezenvolvimentu kapitál umanu nian.

Membru Governu sira rona preokupasaun no sujestaun sira husi Prezidente Repúblika no debate oinsá atu aliña preokupasaun no sujestaun sira-ne’e ho prioridade sira ne’ebé define ona husi Ezekutivu ba tinan oinmai.

Entre prioridade sira ne’ebé define husi Governu ba setór sosiál destaka implementasaun ba programa Bolsa da Mãe Jerasaun Foun, hodi hadi’a ezekusaun no implementasaun ba aihán eskola nian no hadi’a sistema pré-eskolár.