Kona-ba Planu Estratéjiku Dezenvolvimentu Nasionál, Administradór distritu Aileu, Martinho Matos, iha Aileu, Sesta loron 14, fulan Maiu, informa katak ho programa ida ne’e fo biban ba Administradór distritu sira atu bele halo sira nia planu estratéjiku distritál ninian.

Administradór distritu Aileu informa katak, Planu Estratéjiku Dezenvolvimentu Nasionál (PEDN) ne’ebé Primeiru-Ministru hala’o konsulta iha baze ne’e hanesan foin mak hahú hodi trasa planu dezenvolvimentu nasionál hodi halo identifikasaun ba iha baze.

Nia hatutan tan katak Planu Estratéjiku Dezenvolvimentu ida-ne’e bele responde ona realidade iha terenu no distritu hahú mós ona sira nia Planu Distritál ne’ebé lahalai se’es husi Planu Nasionál ne’e fó oportunidade atu halo baze Dezenvolvimentu Distritál ne’ebe saída mak persiza iha futuru no koloka ona mós katak kurtu, médiu no longu prazu saída mak ita halo, maibé tenki halo fazeadamente katak ita tenki halo konsulta ba iha komunidade katak prioridade hirak ne’e saída mak prioridade liu ba povu hanesan bee ka estrada, entaun sira-ne’e mak sai hanesan prioridade uluk, maibé ne’e la’os dehan katak Planu Dezenvolvimentu Nasionál ne’e ita halo tinan ida halo hotu dala ida, tanba iha Timor-Leste tomak problema ne’e lahanesan, entaun planu ida-ne’e bele ona responde saída mak komunidade hakarak.

Administradór ne’e mos hatutan tan katak, ho Planu Estratéjiku Dezenvolvimentu Nasionál ne’e fó oportunidade ba Administrador distritu sira atu halo mós Planu Estratéjiku Distritál ninian no liu husi ida-ne’e bele halo ona desentralizasaun hanesan ita rona katak, 2011 se hahú fo osan ona ba iha distritu, sub-distritu no suku sira atu bele kria dadauk ona kampu servisu ba iha komunidade iha baze.

Nia mós hatutan katak hakarak ka lakohi, ita laiha fundu seluk tanba fundu hosi impostu domestiku ninian ne’e la to’o, entaun ita tenki hasai duni 3% hosi fundu petrolferu ninian, se ne’e la to’o, entaun tenki buka oinsá atu konvense ba malu atu hetan konsensu ida atu hasai liu husi ida-ne’e hodi bele responde ba nesesidade sira povu nian. See ita lahasai osan ita labele responde ba nesesidade sira povu nian, maibé tenki halo desentralizasaun, se ita hasai osan bo’ot mak lahalo desentralizasaun ne’e ita lahalo buat ida ba iha povu.