Ministru Fidelis lidera delegasaun altu nivel Governu nian ba Estados Unidos da América hodi halo negosiasaun ba kompaktu MCC

Ohin, Ministru Prezidénsia Konsellu Ministrus, Fidelis Manuel Leite Magalhães lidera delegasaun altu nivel Governu nian ba Estadus Unidus America (EUA) hodi halo negosiasaun multimiliaun dolar amerikanu ba programa kompaktu liu husi Governu Estadus Unidus America nia Ajénsia Millennium Challenge Corporation (MCC).

Delegasaun neé hamutuk nain sanulu resin ha’at kompostu husi Ministeriu Prezidénsia Konsellu Ministrus, Fidelis Manuel Leite Magalhães ho ekipa, Vise-Ministru Finansas, Antonio Freitas, Reprezentante husi Ministeriu Edukasaun, Joventude no Disportu (MEJD), Diretór Jeral Antoninho Pires, Reprezentante husi Ministeriu Ensinu, Superior, Siensia no Kultura (MESSC), Diretór Jeral Maria Fernanda Lay, Prezidenti Bee Timor-Leste (BTL,E.P), Eng. Carlos dos Reis Peloi ho Diretór Ezekutivu Nasíonal Compact Development Team Timor-Leste (CDT-TL), Embaixadór Constâncio Pinto no ekipa.

Delegasaun sei hela iha Washington, D.C, husi 7-17 Abril 2022. Ministru Prezidénsia Konsellu Ministrus, Fidelis Manuel Leite Magalhães hateten: “Objetivu husi misaun neé mak atu negoseia kona-ba akordu kompaktu MCC ba Timor-Leste. Negosiasaun sei hahu iha loron 11 fulan Abril tinan 2022 no hanoin katak sei konklui iha loron 17 fulan Abril tinan 2022. Ami dezeiza rezultadu neébe exelente husi negosiasaun ne’ebé sei lori ita ba asina akordu kompaktu entre Timor-Leste ho Estadus Unidus America” hateten Ministru Fidelis”.

Konsellu Ministrus delega ona kompetensia ba Ministru Prezidénsia Konsellu Ministrus, Fidelis Manuel Leite Magalhães hodi negoseia no asina akordu Compact ho Estados Unidos da América nia Ajénsia Millennium Challenge Corporation (MCC).

Investimentu ne’e sei foka ba Programa Kompaktu boot rua mak hanesan Projetu tratamentu Bee, Sanementu no Drenazen ne’ebé inklui disinfesaun bee iha nivel nasíonal, esgotus, sistema drenazen, hametin instituisaun sira ho orgaun regulador sira, no kriasaun ba abastecimento sólido de água ho esgotus ba uzu domestiku ne’ebé ho nia prosedimentu avansadu no enjeñaria nivel internasíonal ho Projetu Edukasaun ne’ebé sei inklui Sentru Exelénsia foun ida ba formasaun manorin sira iha ne’ebé sei asegura estandarizasaun kualidade ba lideransa sira. Pakote asistensia tinan lima ne’e ho nia estimativa orsamentu tokon rihun haat ualunulu resin haat dolar amerikanu (US$ 484.000.000,00) iha ne’ebé envolve tokon rihun haat ruanulu dolar amerikanu (US$ 420.000.000,00) husi MCC, hamutuk ho tokon neenulu resin ha’at dolar amerikanu (US$64.000.000,00) kontribuisaun husi Governu Timor-Leste.

url: http://timor-leste.gov.tl?lang=tp&p=30422