Timor-Leste simu ona ohin, 28 fulan-marsu tinan 2022, vasina Sinovac doze rihun 100, seringa, ventiladór 20, konsentradór oksijéniu nian 20 no teste rihun 20 ne’ebé oferese husi Repúblika Populár Xina.

Iha serimónia entrega nian, ne’ebé hala’o iha Servisu Autónomu Medikamentus no Ekipamentus Saúde nian (SAMES), Vise-Ministru Saúde, Bonifácio Mau Coli dos Reis, formalmente simu ona vasina no ajuda sira seluk husi Embaixadór Xina nian iha Timor-Leste, Xiao Jianguo. 

Ida-ne’e maka lote da-15 produtu sira medisina nian no ekipamentu sira hodi kombate epidemia COVID-19 ne’ebé fornese husi Governu Xinés.  Ida-ne’e maka lote daruak vasina Sinovac nian ne’ebé Timor-Leste simu, hafoin lote ne’ebé simu ona iha tinan kotuk, iha loron 5 fulan-juñu.

Durante serimónia ne’e, Vise-Ministru agradese, “lori Governu nia naran, kompromisu no asisténsia ne’ebé jenerozu ne’ebé Governu Xina nian fó ona ba setór saúde nasionál nian”.