Progresu kumulativu ba konstrusaun Portu Baía Tibar to’o iha loron 31 Dezembru 2021 atinji ona 72%. Governu Timor-Leste liuhusi Escrow Account Fundu Viabilidade ne’ebé jere husi Ministériu Finansas, hahú husi Agostu 2019 to’o Dezembru 2021, dezembolsa ona pagamentu Viability Gap Fund (VGF) ho montante millaun $84,1 ba kompaña Timor Port S.A, ne’ebé mak hanesan konsesionáriu projetu Parseria Públiku-Privada (PPP) Portu Baía Tibar.

Bainhira hahú halo operasaun, Portu Baía Tibar sei troka Portu Díli hodi fasilita movimentu importasaun no esportasaun sasán ho kapasidade karga kontentór hamutuk millaun ida kada tinan. Portu ne’e inklui ka’is ida ho bersus rua ne’ebé sei uza hodi redus atrazu iha libertasaun kontentór inklui kustu tranzasaun atu fasilita efisiénsia iha servisu alfandegáriu no atividade komérsiu.

“Efisiénsia hirak ne’e konsidera hanesan pasu importante ida ba Ministériu Finansas iha ámbitu Reforma Fiskál no Jestaun Finansas Públikas – prioridade xave ida husi Programa Oitavu Governu Konstitusionál,” Ministru Finansas, Rui Augusto Gomes hateten. “Efisiénsia hirak ne’e mós sei ajuda Governu liuhusi Ministériu Finansas atu kolekta reseitas ho maneira ida ne’ebé lais, justu no transparente.” 

“Portu foun modernu ne’e sei fasilita Timor-Leste ninia konektividade marítima iha rejiaun Ázia, liga Ita-nia país ba merkadu komérsiu globál no mellora Ita-nia asesu komérsiu ba merkadoria sira hanesan agrikultura, turizmu, peskas, pekuária nomós indústria sira seluk – dalan ida atu ajuda Timor-Leste diversifika ninia produsaun,” Governante ne’e konklui.

Konstrusaun Portu Baía Tibar ho modalidade PPP husi parseria entre Governu Timor-Leste ne’ebé aloka millaun $130 iha Fundu Viabilidade (VGF, sigla Inglés) no Timor Port, subsidiáriu husi Bolloré ho millaun $150, hamutuk millaun $280 ba faze inísiu husi totál investimentu estimativu millaun $500 ba tinan 30.

Daudaun ne’e, totál traballadór ne’ebé mak servisu iha projetu konstrusaun Portu Baía Tibar hamutuk 949. Husi númeru ne’e, traballadór Timoroan hamutuk 579 (61%).

Relasiona ho dezenvolvimentu konteúdu lokál, to’o iha Dezembru 2021, kompaña konstrusaun China Harbour sub-kontrata ona servisu balun ba kompaña lokál 69 ho montante millaun $21,2 no Timoroan hamutuk 392 mak servisu indereita ho kontratór hirak ne’e.