Governu ho responsavel sira Millennium Challenge Corporation nian hala’o sorumutuk virtuál iha ámbitu preparasaun faze negosiasaun “kompaktu” nian ba projetu sira ne’ebé finansia husi ajénsia kooperasaun amerikana ida-ne’e nian

Ministru Prezidénsia Konsellu Ministrus, Fidelis Manuel Leite Magalhães, hala’o ona sorumutuk, liuhusi videokonferénsia, iha loron 18 fulan-fevereiru tinan 2022, ho Konsellu Administrasaun Millennium Challenge Corporation nian (MCC), iha Washington, iha ámbitu preparasaun faze negosiasaun “kompaktu” nian ba projetu sira ne’ebé finansia husi ajénsia kooperasaun amerikana nian.

Iha fulan-marsu oinmai, Ministru Fidelis Magalhães sei dezloka ba Estadu Estadus Unidus Amérika hodi halo negosiasaun sira ba akordu kooperasaun ida-ne’e nian. Objetivu husi faze ida-ne’e maka atu finaliza dokumentu “kompaktu” no programa ba implementasaun projetu nian sira, ne’ebé inklui detalle sira kona-ba sira-nia rekizitu legál, finanseiru no administrativu sira.

Objetivu husi programa ida-ne’e, ho valór osan besik dolar amerikanu millaun 400, maka redús insidénsia ba moras sira iha país, liuhusi hadi’a sistema tratamentu bee moos, saneamentu no drenajen nian iha Dili, no hadi’a kualidade Ensinu Sekundáriu nian liuhusi estabelesimentu ba Sentru Formasaun Exelénsia nian ida ba profesór sira ensinu sekundáriu nian no ba lider eskolár sira.

Millennium Challenge Corporation ne’e nu’udár ajénsia kooperasaun nian ida husi Estadus Unidus Amérika, ne’ebé kria iha tinan 2014, ho objetivu prinsipál sira atu promove kreximentu ekonómiku no luta kontra ki’ak.

Konsellu Administrasaun MCC nian selesiona ona Timor-Leste, iha fulan-dezembru tinan 2017, nu’udar nasaun ida ne’ebé kumpre kritériu sira atu dezenvolve programa “kompaktu” ida.

Iha fulan-jullu tinan 2018, Ministru Fidelis Magalhães asina ona Akordu ba Finansiamentu Inisiál ida ho MCC, hodi kria ekipa responsavel ida atu identifika setór ekonómiku sira  ne’ebé sei dezenvolve durante implementasaun programa ne’e nian.

Ekipa ida-ne’e ofisiálmente kria ona iha fulan-marsu tinan 2019 no iha ne’ebá hahú serbisu hamutuk ona ho pontu fokál sira hosi liña ministeriál relevante sira no ho delegasaun sira MCC nian iha definisaun ba área prioritária sira programa nian.

Konsellu Ministrus, iha sorumutuk ikus nian, delibera ona hodi fó podér tomak ba Ministru Fidelis Magalhães atu halo negosiasaun no asina akordu sira ne’ebé temi ona.

url: http://timor-leste.gov.tl?lang=tp&p=30143