Prezidénsia Konsellu Ministrus

VIII Governu Konstitusionál

……………………………………………………………………………………………………………

Komunikadu Imprensa

Sorumutuk Konsellu Ministrus nian iha loron 16 fulan-fevereiru tinan 2022

Konsellu Ministrus hala’o sorumutuk iha Palásiu Governu, iha Dili no, aprova ona ho alterasaun sira ba projetu Rezolusaun Governu nian, ne’ebé aprezenta husi Vise-Ministra Finansas, Sara Lobo Brites, ne’ebé estabelese estrutura administrativa responsavel ba realizasaun Resenseamentu Jerál ba Populasaun no Abitasaun nian ba tinan 2022 (Sensu 2022).

Governu nia rezolusaun ida-ne’e define sé mak integra ba kada komisaun tolu ne’e ida ne’ebé harii estrutura administrativa responsavel ba realizasaun Sensu tinan 2022.  Komisaun tolu ne’e mak hanesan:

• komisaun nasionál ba sensu 2022 ne’ebé nia misaun mak halo orientasaun polítika no administrativa husi atividade sensitária (sensu nian), nune’e mós halo mobilizasaun ba rekursus umanus no materiál nesesáriu sira.
• komisaun téknika ba sensu 2022 nian ne’ebé sei halo avaliasaun téknika ba atividade sensitária, revizaun ba instrumentu sira sensu nian no rekomendasaun husi prátika sira ne’ebé di’ak liu ba rekolla no tratamentu dadus nian; no
• Komisaun ba publisitasaun sensu 2022 nian ne’ebé sei responsabiliza hodi informa no prepara públiku ein jerál ba atividade sensitária.

Resenseamentu Jerál Populasaun no Abitasaun nian ne’e iha objetivu prinsipál sira ba kontajen no karakterizasaun ba populasaun ne’ebé rezidente iha Timor-Leste, nune’e mós levantamentu ba hela-fatin sira ne’ebé eziste no sira-nia kondisaun moris nian, liuhosi rekolla dadus no elementu sira ne’ebé mak kompletu, ne’ebé realiza liuhusi operasaun sira inkéritu nian no tratamentu estatístiku.

 

Konsellu Ministrus aprova ona projetu Rezolusaun Governu nian, ne’ebé aprezenta husi Vise-Ministru Negósius Estranjeirus no Kooperasaun, Julião da Silva, ne’ebé aprova adezaun ba Akordu-Kuadru kona-ba fasilitasaun komérsiu transfronteirisu nian ne’ebé lahó surat-tahan iha Ázia no iha Pasífiku.

Hein katak Akordu-Kuadru ida-ne’e fornese ba país sira Ázia no Pasífiku nian ferramenta no komplementu dijitál foun ida ba implementasaun Akordu Fasilitasaun Komérsiu Organizasaun Mundiál Komérsiu nian ida ne’ebé di’ak liu no ba dezenvolvimentu komérsiu eletróniku transfronteirisu nian, liuhosi konjuntu komún ida hosi prinsípiu jerál sira no plataforma intergovernamentál ida ne’ebé dedikadu.

Halo aprovasaun mós ba projetu Dekretu-Lei, ne’ebé aprezenta husi Ministru Administrasaun Estatál, Miguel Pereira de Carvalho, ba alterasaun datoluk ba Dekretu-Lei n. 8/2013, loron 26 fulan-juñu, kona-ba Rejime Jerál Programa Dezenvolvimentu Suku (PNDS) nian.

  

Konsellu Ministrus delibera ona hodi autoriza negosiasaun ba Akordu sira “Millennium Challenge Compact” no “Program Implementation Agreement”, entre Estadus Unidus Amérika, liuhusi Millennium Challenge Corporation no Repúblika Demokrátika Timor-Leste.  Konsellu Ministrus deside ona mós hodi atribui ba Ministru Prezidénsia Konsellu Ministrus, Fidelis Manuel Leite Magalhães, podér tomak ba negosiasaun no asinatura ba akordu sira-ne’e.

 

Halo mós aprovasaun ba projetu Proposta Lei alterasaun dahuluk nian ba Lei n. 24/2021, loron 19 fulan-novembru, ne’ebé prosede alterasaun dahuluk ba Lei n. 10/2004, loron 24 fulan-novembru, Lei Sistema Saúde nian no aprova medida exesionál no temporáriu sira ba vijilánsia sanitária sira hodi hatán ba pandemia moras COVID-19 nian, ne’ebé aprezenta husi Ministra Saúde, Odete Maria Freitas Belo. Projetu ba Proposta Lei ida-ne’e nian hodi aumenta prazu vijénsia nian ba medida sira ne’ebé prevee iha artigu da-3 husi Lei n. 24/2021, loron 19 fulan-novembru.

 

Ikusliu, Ministru Administrasaun Estatál, aprezenta ona ba Konsellu Ministrus opsaun polítiku-lejizlativa sira sai hanesan baze ba inisiativa alterasaun nian ba Dekretu-Lei n. 12/2018, loron 25 fulan-abríl, kona-ba subsídiu estraordináriu ba membru sira hosi Órgaun sira Administrasaun Eleitorál nian. REMATA