Ministra Finansa iha Estadus Unidus Amérika
Husi loron 12 to’o loron 21 fulan Abríl, Ministra Finansa iha Universidade Califórnia nian tuir konvite ne’ebé nia simu atu halo debate balu kona-ba Jestaun finansa Públika ho estudante sira Universidade ne’e nian. Ministra mós iha oportunidade hodi ko’alia bá komunidade San Diego nian kona-ba Timor-Leste. Iha sekuénsia ne’e, Ministra dada lia ho profesór sira Universidade ne’e nian ne’ebé hatudu sira nia interese atu tulun Timor-Leste. Nu’udar nia rezultadu mak halo mobilizasaun ba estudante sira ne’ebé hakarak hili Timor-Leste nu’udar destinu interkámbiu ida ne’ebé sei realiza iha veraun oin mai. Estudante sira ne’e sei hetan oportunidade atu fahe sira nia matenek ho ita nia foin-sa’e sira ne’ebé sei sai lider nasaun nian iha aban bainrua nomós ho ita nia povu rasik.
Iha loron 22 no loron 23, Emília Pires hamutuk ho Ministru Infraestrutua nian, Pedro Lay, dezloka ba Washington atu partisipa iha reuniaun loron rua kona-ba “Ministerial Dialogue on Sanitation and Water for All: A Golbal Framework for Action”. Aleinde reuniaun ida ne’e, Ministru no Ministra ne’e mós hasoru malu ho entidade importante sira hanesan Sra. Sara Cliffe, Reprezentante Espesiál no Diretora Banku Mundiál nian, Sr. Jeffrey Gutman, Vise-Prezidente Banku Mundiál nian no Xefe Operasaun, Polítika no Servisu Nasionál sira nian, Sr. Profesór Jeffrey Sachs no ninia grupu, nomós Sr. George Soros, Prezidente Fundu Jestaun Foros nian no fundadór Sosiedade Aberta.
Atu termina, iha loron 24, Emília Pires no Pedro Lay dezloka ba Nova Iorke hodi halo enkontru ida ho Sra. Sofia Gomes, Embaixadora ba MisaunPermanente iha Nasaun Naklibur sira (Nasoens Unidas) iha Timor-Leste. Iha enkontru ne’e sira ko’alia kona-ba g7+ no Diálogu Internasionál kona-ba harii Pás no Estadu iha ne’ebé foka liu kona-ba oinsá hetan dalan ne’ebé di’ak liu ato koordena tema ida ne’e, katak agora Timor-Leste ezerse papél importante ida iha nivel globál.
