Lei Foun Komisaun Funsaun Públika nian aprova ona iha jeneralidade iha Parlamentu Nasionál

Ter. 08 fevereiru 2022, 15:01h
oge 2021 pasaa

Ohin, loron 8 fulan-fevereiru tinan 2022, Parlamentu Nasionál aprova ona iha jeneralidade Lei Foun Komisaun Funsaun Públika nian ho votu a afavór 32, kontra 6 no abstensaun 1.

Iha sesaun plenária, Ministru Prezidénsia Konsellu Ministrus, Fidelis Manuel Leite Magalhães, ne’ebé halo enkuadramentu jerál ida kona-ba Lei ida-ne’e no  hatán ba preokupasaun deputadu sira.

Konsellu Ministrus aprova diploma ne’e, iha sorumutuk loron 28 fulan-jullu liubá, ho objetivu liu ona tinan sanulu hafoin harii Komisaun Funsaun Públika nian, ho lei ida-ne’e atu reforsa garantia sira independénsia atuasaun Komisaun ne’e nian no ninia komisáriu sira no iha tempu hanesan atu halo reforma ba ninia ámbitu intervensaun nian, liuliu atu rezolve dezafiu sira ne’ebé hasoru, no ne’ebé sai ona obstákulu ida ba efisiénsia funsionamentu Funsaun Públika nian.

Ho Lei foun ida-ne’e ho intensaun atu Komisaun Funsaun Públika iha papél apoiu nian ida hodi define polítika públika sira funsionalizmu públiku nian, nune’e mós atu reforsa kompeténsia sira Ministériu sira nian iha ninia implementasaun, tuir termu númeru 3 hosi artigu da-115 Konstituisaun Repúblika nian.

Lei foun ne’e mós ho objetivu atu klarifika podér sira intervensaun Komisaun Funsaun Públika nian, ne’ebé iha papél hodi garante promosaun ba legalidade, igualdade no independénsia funsaun públika nian.

   Ba leten